‘Matar a un ruiseñor’ filma XIV. Zinexit - Giza Eskubideen Zinema Erakustaldia zarratzeko

| Ikusi handiago | Argazki originala

Zinexita, Eusko Jaurlaritzako Justizia eta Gizarte Politiketako Sailak, Giza Eskubideen, Biktimen eta Aniztasunaren Zuzendaritzearen bidez, sustatzen dauen Erakustaldia, bihar, barikua, amaituko da. Aste honetan zehar, oinarrizko eskubideen inguruan hausnartzera gonbidau gaitu, erreferentziazko lan zinematografikoetatik abiatuta, zineforum klasikoen eskemeari jarraituz: film baten proiekzinoa eta, ondoren, ikus-entzule guztiei edegitako barriketaldia.

Matar a un ruiseñor (1962)

Tradizinoari jarraituz, Giza Eskubideen Zinema Erakustaldia klasiko bategaz amaituko da, Robert Mulliganen To kill a mockingbird obreagaz, hain zuzen be. Zehetasunez betea eta mezua eta sentiberatasun bikaina dituan maisulana; arrazakeriaren eta arraza-bereizketearen kontrako jarrerea eta umezaroaren ikuspegi parebakoa, Gregory Pecken ibilbide osoko interpretazinorik onenetakoa izateaz gan.

Matar a un ruiseñor filma 25. postuan dago American Film Institutek 2007an egindako AEBetako film onenen zerrendan. Eta 1995etik maila kulturalean, historikoan eta estetikoan, sano esanguratsua da Kongresuko Liburutegiak zehaztu dauenez.

Black box diaries (2024)

Gaur, eguena, hilak 28, Black box diaries film dokumental japoniarraren txandea izango da. Aurtengo Sundance Zinemaldian proiekzino berezia izan da eta emakume batek justiziare bila, burrukearen kronikea kontetan dau: Shiori Itô praktiketako kazetaria zan, kazetari politiko boteretsu batek drogau eta bortxatu ebanean. Poliziak eta sistema judizial arkaikoak alde batera itxita, bere ikerketeari ekitea erabagi eban. Filma, nazinoartean asko saldu da, Japoniako sistema judizial eta sozial zaharkituak agirian ixten dituan kasu enblematikoa izan da.

Barriketaldirako, Oscar Seco Revilla Bizkaiko Foru Aldundiko Gizarteratze zuzendari nagusia, eta Carmen Muñoz López ekintzaile feminista eta hainbat komunikabidetako kolaboratzailea, izango ditugu.