Benito Lertxundik agur esan deutso ibilbide musikalari

| Ikusi handiago | Argazki originala

Disko barriaren iragarpenaz gan Benitok aitamen garrantzitsua egin dau, haren ibilbidean mugarri izango dana, izan be, oholtzari agur esateko erabagia hartu dau. Sei hamarkadatan etenik izan ez dauen ibilbide oparo baten ondoren kontzertuak emoteari ixteko garaia heldu jako, nahiz eta ez dauen baztertzen, musikea edo sormen artistikoakaz hartu-emonetan jarraitzea.

Oriotar kantaria bere entzulegoari esker oneko agertzen jako, horrek adierazo deutson maitasunagaitik. Horregatik berezia da agur hau Gernika kontzertuan diskoagaz batera etortea, jarraitzaileakaz sortutako energia eta egiazkotasuna jasoten baitau, Jai-Alai enblematikoa lekuko.

Gernika kontzertuan

Benito Lertxundik 2023ko zemendiaren 11an Gernikako Jai-Alai pelotalekuan eskainitako kontzertua jasoten dau lan horrek.

Berak nabarmendu dauenez, ez da apropos egindako diskoa izan, bai, ostera opari bezela eskuetara etorri jakona. Halanda ze hunkiturik alkarbanatu nahi izan dau komunikabideen aurrean, kontzertua egin zan leku berean eta hitzordu haren atontzaile Haziberriren eskutik.

20 kantuz eta hainbat doinuz osotutako disko horretan jaso da gau haretan izandako giro aparta, izan be, 2.000 ikus-entzule batu ziran. Kantu ezagun eta barriak entzun ahal izango dira, baita oraindino argitarau bako kantu barri bat: Ez nabil ezeren bila.

CD bikotxa eta LP hirukotxa eskuragarri dagoz gaurtik aurrera ohiko salmenta guneetan, Durangoko Azokan eta hemen.

Gernika kontzertuan diskoaren zehetasunak:

• Musikariak: Juantxo Zeberio: pianoa, organoa eta sintetizadorea.
• David Gorospe: bateria.
• Amaiur Cajaraville: baxua.
• Gurutz Bikuña: gitarra akustikoa eta elektrikoa.
• Angel Unzu: gitarra akustikoa eta bouzukia.
• Xabier Zeberio: arrabita eta nickelharpea.
• Pello Ramirez: biolontxeloa eta eskusoinua.
• Intza Unanue: abeslaria.
• Olatz Zugasti: abeslaria, harpea eta tekladuak.
• Benito Lertxundi: abeslaria eta gitarrea.
• Soinua eta grabaketea: Eragin.
• Nahasketak eta produkzinoa: Benito Lertxundi eta Olatz Zugasti.
• B.L. taldearen kudeaketea: Gratxina Lertxundi.
• Masterra: Doctor Master.
• Argiak: ATG.
• Argazkiak: Hibai Agorria.
• Diseinua eta maketazinoa: Dabid Zelaia eta Markel Urrutia.