Xabi Aburruzagak 'Soinu Gorria' liburua aurkeztu dau

| Ikusi handiago | Argazki originala

Soinu Gorria liburua Xabi Aburruzagaren ibilbide musikal emonkorraren isla da eta bere esperientzia trikitixearen inguruan konpositore, interpretatzaile, produktore eta irakasle lez batzen dau. Liburu honek, 20 piezen partiturak eta azalpen didaktikoak eskainiz, musika tradizionalaren eta barrikuntzearen arteko loturea erakusten dau, bai hasibarrientzat bai musikari profesionalentzat baliogarria izateko be.

Xabi Aburruzaga trikitilari eta musikagileak bere bigarren liburua, Soinu Gorria, aurkeztu dau. Idea pandemia garaian jaio zan, Aburruzagak musikarien partiturak eskatzen eutsiezan mezu ugari jaso ostean. 20 urte baino gehiagoko irakaskuntzearen ondoren, trikitixearen interpretazinorako bere kantu propioen bildumea osotu dau, bere sormenak eta trikitixearen ikerketa eta sorkuntzako lanak ondorengoentzako geratu daitezan.

Partituretan melodiaren eta akonpainamenduaren zehetasunak sartu ditu eta QR kodeen bidez Xabi Aburruzagak berak pieza bakotxa zelan jo azaltzen daben bideoetara sarbidea emoten da. Kantuen inguruko testu eta azalpenak be badagoz, abesti bakotxaren testuingurua eta sormen-prozesua hobeto ulertzeko.

Liburuan hamaika ilustrazino dagoz, partitura argi eta zehetasunez beteak.

Kontuak kontu, Xabi Aburruzagak Durangoko Azokan egingo dau Soinu Gorria liburuaren aurkezpena.

Xabi Aburruzaga

Portugaleteko trikitilari eta musikagilea da, Euskal Herriko musika tradizinoa eta barrikuntzea buztartzen maisua. Sei disko argitaratu ditu eta eta bere musikea mundu osoan zehar eskaini dau, bakarka zein bere taldeagaz.

Interpretatzailea eta produktorea be bada eta beste musikarientzat be sortzen dau. 20 urte inguru emon ditu irakasle lanetan eta trikitixearen transmisinoa eta ezagutzea sustatuz belaunaldi barrien artean. Aburruzagaren ibilbide artistikoa kalidadez, sormenaz eta lankidetzaz josia dago, Euskal Herriko musika panoraman erreferente bilakatuz.