Lorea Argaratek jasoko dau Gladys saria

Lorea Argarate Zubia. Erretratua: Puntu.eus | Ikusi handiago | Argazki originala

Lorea Argarate Zubia (Bilbo, 1990) teknologo, dibulgatzaile eta musikari bilbotarrak jasoko dau aurtengo Gladys Saria, datorren irailaren 26an UPV/EHUko Informatika Fakultatean (Donostia) egingo dan ekitaldian. Epaimahaiak Argarateren ekintzailetasuna; dibulgazino-lana eta ibilbide aberatsa nabarmendu ditu sariduna iragarterako orduan.

Lorea Argarate Zubia (1990)

Bilbon jaio eta Berlinen bizi da. Arlo akademikoan fisika gradua hasi baeban be telekomunikazino injinerua da (Deustuko Unibersidadea, 2016). Antolakuntza industrialeko graduondokoa egina dau (Deustuko Unibersidadea, 2017) eta master bi: Big Data & BI (Deustuko Unibersidadea, 2017) eta irakasleen prestakuntza masterra (VIU, 2018). Blockchain programea be osotu eban Deustuko Unibersidadean (2018). Egun TAZEBAEZ kooperatibako ekintzailea da eta hezkuntza arloko barrikuntza eta digitalizazino prozesuetan dabil Berlinen eta Bilbon.

Musikea dau pasino eta horrek fisikako ikasketak egitera bultzatu eban, akustikea ikasteko asmoagaz. Halan da be, ikasketak ez zituan momentu horretan amaitu eta telekomunikazino injinerutzan hasi zen, soinuan eta irudian espezializauta. Bertan, arlo digitala eta programazinoa deskubridu zituen.

Gradua amaitu ondoren, beste esparru batzuetan sartzeko gogoz, antolakuntza industrialeko eta Big Data-ko masterrak egin zituan. Orduan hasi zan Deustotech-en lanean. Hezkuntzeagaz eta zientzia-dibulgazinoagaz zituan hartu-emonak estuak ikusita, irakasleen prestakuntzarako master bat be egin eban, oinarri sendoagoak izateko.

Argarate oso gaztetatik bizi izan da zientzia eta teknologiaren dibulgazinoan, bertako eta kanpoko agenteakaz hartu-emonetan, jakintzea partekatuz. STEAM ikuspegia oso presente izan dau, InspiraSTEAM proiektuaren hasierea biziteko aukera izan baitzeban eta ordutik, neskatilakan izan daitekeen inpaktuari erreparau deutso.

White Mirror / Tech for Good teknologia esponentzialak ongizaterako programearen sorreran parte hartu eban. Hainbat erakunderegaz kolaborau dau, besteak beste, puntueus.eus, Elhuyar eta Gaztea.

Gaztea izan arren, foro askotan parte hartu eta sarritan gonbidetan dabe ingurune digitalaz berba egiteko. Eduki gehienak euskeraz egiten ditu, gazteei zuzenduak, hereen formatu eta hizkuntzan. Loreak proiektuak genero-ikuspegiagaz lotzen ditu, estereotipoak apurtuz, profesino barriak erakutsiz eta besteak inspirauta.

Klarinete jotzaile legez karrerea egina dau, baina azken urteotan ezagunagoa da musika elektronikoan egin dauen ibilbideagaitik. Las Tea Party DJs musika proiektuko eta Mazmorra taldeko kidea izan zan. Gaur egun Mauriziak ez du inor hil-en dabil eta bakarka be ibilten da Hamaika izenpean.

Gladys Saria

PUNTUEUSek eta UPV/EHUko Informatika Fakultadeak atondu dabe Gladys Sariaren hirugarren edizinoa, Gipuzkoako Foru Aldundiaren Bardintasunerako Organoaren, Danobatgroup industria-taldearen babesaroi esker eta UPV/EHUko Bardintasun Zuzendaritzearen laguntzeagaz.

Gladys Sariak ingurune digitalean dabizen emakume gazte euskaldunak saritu, gazteentzat erreferenteak sortu eta egiten daben lana jentarteratzea dau helburu, Gladys del Estal informatikaria gogoratzeagaz batera. Saria emoteko ekitaldia irailaren 26an izango da, goizeko 11:00etan, UPV/EHUko Informatika Fakultadean.