Tabakalerak Jessica Sarah Rinland artisteari eskainiko deutso erakusketea

| Ikusi handiago | Argazki originala

Tabakalerak eta Rotterdamgo nazinoarteko zinema-jaialdiak (IFFR) Jessica Sarah Rinland errealizadore argentinar/britainiarrak sortutako Extramission. Begi distiratsuen ehizan erakusketearen inaugurazinoa iragarri dabe. Erakusketea, Donostia Zinemaldiagaz lankidetzan atondu da eta Tabakalerako 2 erakusketa-aretoan aurkeztuko dabe datorren irailaren 17an. Egun berean, Zabaltegi-Tabakalera sailean lehiatuko dan Monólogo colectivo film luzea proiektauko da.

Jessica Sarah Rinland artista eta zinegile ezaguna da nazinoartean zine dokumentalean dauen ikuspegi esperimentalagatik eta narratiba bereziagatik. Oraintsu, Tabakaleraren eta Rotterdamgo nazinoarteko zinema-jaialdiaren eskutik, erakusketarako propio sortu dauen ikus-entzunezko instalazinoa aurkeztuko dau. Tabakaleran erakutsi ondoren, Herbehereetako urian be izango dabe ikusteko aukerea, datorren urtarrilean egingo daben zinemaldiaren barruan.

Aldi berean, Jessica Sarah Rinlanden azken filma, Monólogo colectivo Locarnoko zinema-jaialdian datorren astean estreinatuko da. Filmak eta instalazinoak Tabakalerako ikus-entzunezko laborategiaren laguntzinoa izan dabe postprodukzino-fasean.

Rinland zinegilearen ibilbideak eta sortze-prozesuaren emoitzak agerian ixten dabe Tabakalerak, Donostia Zinemaldiak eta Elías Querejeta Zine Eskolak sorkuntza prozesuak sustatu eta sortzaileak laguntzeko osotutako sarearen garrantzia. Ganera, Rotterdamgo zinema-jaialdiagaz, ikus-entzunezko instalazino barrien produkzinoa babesteko Tabakalerak bultzautako erakundeen arteko lankidetzak sendotu egiten dau zinea eta arte garaikidea buztartzeko zentroak egindako apustua.



Aipatutakoaren adibide da 2022an Tabakaleran ikusgai egon zan Vive le cinéma! erakusketea. Dea Kulumbegashvili, Isaki Lacuesta, Lemohang Jeremiah Mosese eta Jia Zhang-ke zine-zuzendarien ikus-entzunezko sorkuntzak aurkeztu ziran bertan. Lau zinegileek, euren ohiko jardunak egokitu eben, hau da, filmak egitea, erakusketa-areto batean ikusgai egongo ziran ikus-entzunezko piezak sortzeko.

Bide beretik, 2023an Tabakalerak erakusketea eskaini eutson Isabel Herguera artista eta zine-zuzendariaren El sueño de la sultana filmearen sortze-prozesuari. Zuzendaria eta bere taldea Tabakalerako Artisten Gunean ibili ziran aldizka lanean 2016az geroztik. Holan, artistearen estudioa balitz bezala atondu zan erakusketea. El sueño de la sultana Animazinoko Film Onenaren Goya Sarirako izentau eben eta animazinoko lehenengo film europarra izan zan Donostia Zinemaldiko Sail Ofizialean lehiatzen.

Extramission. Begi Distiratsuen ehizan

Jessica Sarah Rinlanden bideo-instalazinoak irudiak eta audio-grabazinoak konbinetan ditu XX. mende hasierako National Geographic aldizkariaren artxiboekaz. Rinlanden lanetan kontserbazino eta abarriratze ekintzek adierazoten dabe egungo zaintza-ekintzek iraganeko indarkeriak ikusgai jarri ahal dirala.