Arriaga Antzokiak Jasangarritasunaren Europako Ziurtagiri Berdea jaso dau

'Orgia' | Ikusi handiago | Argazki originala

Arriaga Antzokiak Europako ziurtagiri garrantzitsua irabazi dau emisino garbien helburuaren alde egindako lanagaitik. Aviñongo Jailadiaren barruan, antzokiak ETC Theatre Green Book-aren (ETCren Antzokien Liburu Berdearen) Oinarrizko ziurtagiria irabazi dau. Antzerki jasangarrirako tresna barri bat da, bai eta Europako antzokiei eskaintzen jaken autoziurtagiri-sistema bat be. Sistema horren bidez, beren produkzino, eragiketa (elikadura, logistika eta bidaiak) eta eraikinetan klima neutraltasunaren helburua bete ahal izateko tresna eta kalkulagailu erabilerrazak eskaintzen jakez antzokiei.

Arriaga Antzokiarentzat, ziurtapen honek azken urteotan jorratzen dabizen jasangarritasunaren aldeko jarrerea baieztatzen eta berresten dau, produkzino propioak diran ikuskizunak gauzatzerako orduan egindako lanari erreparauta.

Europako ziurtagiri barriaren harian, Georg Häuslerrek, Europako Batzordeko Kultura, Sormen eta Kirol zuzendariak honakoa esan dau: mendeetan zehar, Europako antzokiak komunidadeak eregitek gune garrantzitsu legez nabarmendu dira. ETC Antzokiaren Liburu Berdeak sektoreko erreferenteetako bat izango dala agintzen dau, hainbat eragile batzen baititu antzoki jasangarri baterako estandarrak sortzeko eta dobako eta erabilerraza dan gida bat aurkezten baitau eszenatokiaren barruan eta kanpoan 2030erako zero emisino garbiak lortzeko. ETC Theatre Green Book-aren autoziurtagiri-prozesua martxan jartea interesgarria da, antzokien bilakaerearen jarraipena egiteko lehen urratsa baita. Europa Sortzailea Programeak Europako Antzerki Foroa atondu eban 2023an eta antzerkiaren sektorearen erronka eta aukeren inguruko alkarrizketarako gunea eskaini eban. Espero daigun borondatezko tresna honek kulturearen eta sormenaren sektoreko beste batzuk be jasangarritasunean ezinbesteko aurrerapausuak emoten astea.

Arriaga Antzokiak honako hau egin behar izan dau oinarrizko ziurtagiria lortu ahal izateko:

• Produkzino gehienak oinarrizko maila betez egitea, hau da, produkzinoan erabilitako material guztien % 50 lehenago erabilitakoa izatea eta ikuskizunean erabilitako materialen % 65 berrerabiltea edo birzikletea.
• Eragiketa gehienak oinarrizko maila betez egitea (eragiketen sei kategorietatik lautan), besteak beste, hondakinak apurka-apurka murrizteko, adibidez.
• Eraikinerako jasangarritasun plan bat egitea eta energia-konsumoa murrizteko neurri errazak hartzea.

Ziurtagirien prozesu barria ETC sareko 9 antzokik probau dabe, baita Arriaga Antzokiak be eta urtebetean ibili dira ETCren Antzokien Liburu Berdearen neurriak apliketan, antzokietan oinarrizko mailea lortu arte.