Bermeoko Andra Mari eta Santa Eufemia jaietako kartel lehiaketea martxan

| Ikusi handiago | Argazki originala

2024ko Andra Mari eta Santa Eufemia jaietako kartel lehiaketara aurkezteko epea zabalik dago bagilaren 28ko eguerdiko 14:00ak arte, eta aurkeztutako lanetatik aukeratuko da Bermeoko jaietako egitaraua eta kartela iragarteko erabiliko dana.

Kartela Bermeoko jaietako adierazle izan behar da eta horretarako honako ezaugarri honeek hartuko dira kontuan: jai herrikoiak eta herritarrentzat izatea, parte-hartzaile eta sortzaileak, euskaldunak, feministak, solidarioak eta ekologistak. Kartelean ondoko testua txertatu behar da: Bermeoko Jaiak 2024 Irailaren 7tik 16ra.

Lanak, derrigorrez, 50x70 zm-koak izan behar dira, eta gura dan beste kolore eta edozein teknika erabili leikie parte-hartzaileek. Lanak hiru modutara aurkeztu daitekez: bereizmen handiko PDF formatuan, CD euskarri informatikoan eta euskarri gogorrean. Kartel proposamenak Gizarte eta Kultura Etxean, Berhaz bulegoan edo Bermeoko Udaleko egoitza elektronikoan aurkeztu behar dira.

Epaimahaian jai batzordeko eta Barrueta arteko alkarteko kideak egongo dira eta euren ardurea izango da aurkeztutako kartel guztiak aztertu eta onenen artean finalistak aukeratzea. Epaimahaiak honakoak izango ditu kontuan: originaltasuna, diseinua, kaliddtea eta estetikea eta, oro har, herriko jaietan parte hartzea sustatzeko erakargarrienak eta egokienak diran eskumeneko alderdiak.

Aukeratutako kartel finalistak garagarrilaren 8tik 16ra arte egongo dira ikusgai Bermeoko Udalaren webgunean, udalaren sare sozialetan eta Gizarte eta Kultura Etxean. Ondoren, irabazlea aukeratzeko prozesua herritarrei zabalduko jake modu bitan: Gizarte eta Kultura Etxean jarriko dan kutxan botoa emonez edo Internet bidez. Persona bakotxak boto bakarra emon ahal izango dau.

Kutxan jasotako botoek % 70eko balioa izango dabe eta Internet bidez jasotakoek % 30a. Irabazlea puntuazino gehien jasoten dauen kartela izango da. Lan irabazlea zein dan garagarrilaren 19an jakinarazoko da.

Sari bakarra egongo da, 600 eurokoa. Sarituak izan ez diran lanak abuztuan eta irailean batu leikiez egileek. Lehiaketan parte hartzeak, baldintza guztiak onartzen dirala esan gura dau.

Argibide gehiago nahi dabenek, Bermeoko Gizarte eta Kultura Etxean (Irakaskintza 14 -16. Tel.: 946179157; kultura@bermeo.eus) jaso ahal izango ditue. Horrezaz gan, oinarriak hemen ikusi daitekez.