Gaur emon ditue falta ziran Euskadi Literatura Saridunen izenak

| Ikusi handiago | Argazki originala

Kultura eta Hizkuntza Politikako sailburu Bingen Zupiriak gaur goizean emon ditu ezagutzera Euskadi Literatura sarietako aurtengo gainontzeko lau irabazleen izenak: Vitoria-Gasteizko Artium Museoan egindako agerraldian Gaztelaniazko Literatura, Euskerazko Literatura Itzulpena, Saiakerea Euskeraz eta Saiakerea Gaztelaniaz kategorietako Euskadi Literatura Sariak jasoko dituen egileen izenak emon ditue ezagutzera:

· Gaztelaniazko Literaturea: Alejandro Morellón Mariano, El peor escenario posible (Fulgencio Pimentel).

· Euskarazko Literatura Itzulpena: Maialen Berasategi eta Joxe Mari Berasategi, Paradisua (Abdulrazak Gurnah). (Elkar).

· Saiakerea Euskeraz: Miren Billelabeitia Benjoa, Norberak maite duena (Pamiela).

· Saiakerea Gaztelaniaz: Ander Izagirre Olaizola, Vuelta al país de Elkano (Libros del K.O.).

Euskadi Literatura sarietako aurtengo gainontzeko hiru saridunen izenak pasa dan astean iragarri zituen: Arantxa Urretabizkaiak Azken Etxea lanagaitik Euskerazko Literatura modalidadean jasoko dau saria, Patxi Zubizarretak Ume eta Gazte Literaturearen modalidadean Zerria lanagaitik eta Joseba Larratxek Literatur Lanaren ilustrazinoa modalidadean Ni ez naiz Mikel Laboa obreagaitik.

Epaimahaiko kideentzat Alejando Morellón-en El peor escenario posible liburu argi eta dibertigarria da, 'irakurketa gozagarria, gogoetea eragiten dauena, adimen handiz eta umore baltzaren dosi onakaz, ezohikoagaz ditugun hartu-emonez, egoera arrotz edo ezustekoetara egokitzeko dogun gaitasunaz eta horrek bizirauten laguntzen deusku, baita izaki apatiko be bihurtzen gaitu. Edurne Portela, Juan Infante, Aixa de la Cruz, Jesus Camarero eta Patricia Millan egon dira Gaztelanizko Literatura modalidadeko epaimahaian.

Bestalde, Xabier Olarra, Jose Manuel Lopez, Koldo Biguri, Arantxa Etxebarria eta Idoia Gilleneak erabagi dabe aurtengo Euskerazko Literatura Itzulpenaren saria Maialen Berasategiri eta Joxe Mari Berasategiri emotea. Paradisua Abdulrazak Gurnah Nobel Saridunaren obrearen euskerazko itzulpena eta epaimahaiko kideen eretxiz, irakurketa gozoko testua lortu dabe itzultzaileek, itzulpen mekanikotik behar aina urrunduta. Euskera idatziaren tradizino klasikotik aldendu barik, Afrikako mundu urrun eta arrotza ezelako traba barik hurreratzen jako euskal irakurleari, gozamen bihurtuz liburu honen irakurketea”.

Euskerazko Saiakerearen arloan, epaimahaiaren eretxiz, Miren Billelabeitiaren Norberak maite duena liburuak irakurketearen plazerra eta garrantzia defendidu eta proponiduten dau metodologia dialogikoaren bitartez, klasikoak eguneko gaietara eroatea, gazteakaz hartu-emonak izatea eta irakurle gazteen arretea biztea. Ane Miren Larrinaga, Nekane Goikoetxea, Ainhoa Novo, Juan Ramon Makuso eta Xabier Aierdi epaimahaikideek uste dabe Billelabeitiak estilo dotorea, idazkera jasoa, prosa zaindua eta fina erabiliz sortutako testu borobila dala Norberak maite duena.

Azkenik, gaur igarritako laugarren sariaren, Gaztelaniazko Saiakerako Euskadi Literatu Sariaren, inguruan epaimahaiko kideek ondokoa uste dabe: Ander Izagirreren Vuelta al país de Elkano-k idazketan ikerketa historikoaren zorroztasuna hizkera zabar eta umoretsuaagaz buztartzen dau, obrea irakurten dauenari personaiak eta gorabehera historikoak hurreratzen deutsozana. Maria Jesus Pandok, Iñigo Maraurik, Maria Pilar Rodriguezek, Maria Gorosarrik eta Mikel Reparazek osotutako epaimahaiak gaineratu dauenez, Izagirrek personaia heroikoen desmitifikazinoa eskaintzen dau, baina gure begirada garaikidera hurreratuz. Kazetaritza pausatuaren tekniken eta xehetasun esanguratsuaren aukeraketan asmau eta ohiko kronika batetik harago doan lana da. Holan, jatorrizko tesia eta korrontearen kontrakoa dakar, herri isolatu baten iruditik aldentzen dana, itsasora begira bidaiatzen, arakatzen, eboluzionetan eta nahasten dan gizarte baten ikuspegian sakontzeko.

Kultura eta Hizkuntza Politikako sailburu Bingen Zupiriak nabarmendu dauenez, sari horreen helburua da irakurzaletasuna sustatzea, irakurle barriak gure literaturara hurreratzea eta gure egileen lana zabaltzea eta bultzatzea. Egiten daben lana autortzea da asmoa eta hareen sormen prozesuari balioa emon.

Sariak

Eusko Jaurlaritzako Kultura eta Hizkuntza Politika sailak zazpi Euskadi Literatura sari emoten ditu urtero. Aurtengo Euskadi Literatura Sariak emoteko ekitaldia zemendiaren 15ean Getxoko Muxikebarri Zentroan egingo da. Sari bakotxa 18.000 eurokoa izango da eta beste 4.000 euro eskuratu leikez bere lana beste hizkuntza batean argiratzen bada.