Bilbo atzerriko inbersinoa erakarteko uririk onenen 10. postuan sartu da

Bizkaie! 2023-03-16 09:46   Pil-pilean

Europako uri nabarmena da Bilbo Financial Timesen arabera.

fDi Intelligence aldizkariaren European Cities and Regions of the Future 2022-2023 izeneko sailkapenaren edizino honetan, Bilbo Europako 370 uriren artean balorau dabe indar ekonomikoagaitik, enpresa-ehunagaitik eta finantza-ahalmenagaitik eta neurri handiko uritzat hartu dabe.

Financial Times nazinoarteko liderra da informazino ekonomikoari jagokonez eta ganera, fDi Intelligence aldizkariak Euskadi seigarren postuan kokatu dau Top 10 Mid-Sized European Regions Of The Future 2023 – fDi Strategy izeneko sailkapenean.

Financial Times egunkari ospetsuak argitaratzen dauen fDi Intelligence aldizkariak adierazo dau Bilbo atzerriko inbersino zuzena erakarteko Europako neurri handiko hamargarren uririk onena dala.

Orain arte aldizkariak egindako sailkapenetan, Bilbo uri ertain nabarmendu dau eta, beraz, aurten uri handitzat hartzea aurrerapausoak dakarz, bai Bilbok inbersinoetarako erakargune lez dauen nazinoarteko autortzan, bai uribilduaren lehiakortasunerako eta gizarte-ongizaterako talentua erakarteko dauen garrantzian.

Izan be, gaur egun, Zorrotzaurre Bilbon eta lurralde osoan atzerriko inbersinoa eta talentua erakarten jarraitzeko adierazle nagusia da, Barrikuntzako Uri Barrutia dAn aldetik.

Esangura horretan, Bilbo da sailkapenean agertu dan estadu osoko uri handi bakarra eta Europako zenbait urigaz lehian dago, besteak beste, Porto (Portugal), Birmingham, Glasgow eta Manchester (Erresuma Batua), Anberes (Belgika) eta Göteborg (Suedia).

Horrezaz gan, fDi Intelligence aldizkariak Euskadi seigarren postuan kokatu dau Top 10 Mid-Sized European Regions Of The Future 2023 – fDi Strategy izeneko sailkapenean. Lehenengo hiru postuetan Ipar Irlanda, Toscana eta Zürich dagoz, hurranez hurran.

Financial Times

Financial Times nazinoarteko liderra da informazino ekonomikoari jagokonez eta 2016. urtean hasi zan Bilbo aintzat hartzen. Hain zuzen be, 2016an, uribilduak sari bi jaso zituan fDi Strategy Awards sarietan: Smart City eta Education Cluster kategorietan, uri-adimendunaren ereduan aurrera egiteko eta ezagutzan oinarritutako garapena sustatzeko egindako lanari esker.

Argitalpena Atzerriko Inbersino Zuzenaren mundu osoko gorabehera eta jokerak aztertzen dituan nazinoarteko aldizkaririk garrantzitsuena da. 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu