Nazinoarteko Kultura eta Etorkizuna ardatz Euskadi eta Eskoziako ikasleakaz

| Ikusi handiago | Argazki originala

Bigarren urtez jarraian, Euskadiko eta Eskoziako ikasleen ahotsak indarra hartu dau Gernikako Batzar Etxean. Fair Saturday Fundazinoak, Bizkaiko Foru Aldundiak eta Eskoziako Gobernuak sustatutako Nazinoarteko Kultura eta Etorkizuna Eskola Eztabaidearen II. Deialdiaren finala egin da Bizkaiko Parlamentuan. Batzar Nagusiak erakundeko buru Ana Otaduik eta Euskera, Kultura eta Kirol diputadu Lorea Bilbaok egin deutse harrerea ikasle taldeari.

Eztabaida horren helburua gazteek kulturaek etorkizun garatuagoa, bidezkoagoa eta gizatiarragoa eregiteko dauen garrantziaren inguruko gogoetea egin deien sustatzea da, bai eta euren alkarrizketarako eta enpatia sozialerako trebetasunak sustatzea be, kontzientzia kritikoa zabalduz eta, oro har, etorkizunagazko eta, batez be, kultureagazko jarrera positiboa bultzatuz.

Fair Saturday fundazinoaren sortzaile Jordi Albaredaren eskutik argitaratu bako testu bereziak bultzatuta, bigarren edizino honetan Euskadiko 10 ikastetxetako ia 900 ikaslek euren ikasgeletan eztabaidatu eben Fair Saturdayren astean, igazko zemendiaren amaieran. Bizi dogun egoera pandemikoa dala eta, azkenean 5 ikastetxe joan ahal izan dira Batzar Etxera euren gogoetak eta ondorioak azaltzeko eta konpartiduteko: Botikazar institutua, Asi-Leku ikastolea, Vizcaya Ikastetxea, Solokoetxe institutua eta Barrutialde institutua.

Ekimen hau, Bizkaia barruan ez eze, Eskoziako lurraldeagaz be hartu-emonak estutu ditu, eztabaidearen aurreko astean ikasgeletan English Speaking Union Scotlandek online prestetako hainbat tailer atondu zituan eta. Ganera, edizino honetan, nobedade moduan, Bizkaiko 4 ikastetxek parte hartu eben Eskoziako final ofizialean, zemendiaren 30ean, Eskoziako ikastetxe parte-hartzaileakaz batera. Nazinoarteko ekimen hori, kultureak etorkizun hobearen garapenean izan behar dauen zereginaren inguruko gazteen eztabaidarik handienetakoa da.