'Euripean be, urte barrian amesak eregiten jarraitu daigun'

| Ikusi handiago | Argazki originala

Etenbarik dabil euria azkenaldian. Euria eta hotza. Eta goardasola dogun arren, bustiten gara.

Gitxi egin da berba azken aldian kultureak bizi dauen txakalaldiaz. Mauletik Oionera, berba egiten dozun lekuan berba egiten dozula, guztiek aitatzen dabe publiko eskasia. Biziten gagozan aro ilunak, oso egunerokotasun hauskorra marrazten deusku, batez be lehendik be prekarizauta egoan sektore batean gabizan jenteari. Honek hainbat irakurketa izan leikez, baina... Pentsau daigun herri bat, persona bat izango balitx lez hartzen dogula. Bere egoera fisikoa, artikulazinoak eta giharrak, kirolaren bidez landuko baditu, izakera, izana eta kontzientzia, kulturearen bidez landuko ditu. Baina ez jaku begitantzen maila berean jagoten diranik bata eta bestea. Bururik ez dauen herri bigorexikoa bihurtzeko bideratzen gaituen erabagiak hartzen dira etenbarik, publiko eskasiari errua botaz, lanketa falteari bota ordez.

Herriz herriko azpiegituren balantze bat egitea besterik ez dago honetaz jaubetzeko. Kirol instalazinoak barritzeko aurrekontu barriak ataraten diran neurrian, eskolako patioko kantxa txikiaren neurrikoa dan instalazinoetan garatzen da kulturea herri askotan. Kultur eragileen gan ixten da erantzukizuna, gure lana, geure buruen sustengu hutsa izango balitx lez. Lan horrek ardura kolektiborik ez baleu bezela.

Kultureak gure bizi moldeak dudan jarten ditu. Besteen artean, hori dau bere egitekoa. Eta ispilu hori ez da beti atsegina izaten. Horregaitik ete da hain hauskorra?

Gure partetik, ilusinoz eta gogoz, zenbait proiektu barrigaz ekingo deutsagu urteari. Euripean egon arren, ohituta gagozalako eguraldi okerrari aurre egiten.

Urte barri on bat danoi, eta besarkada bana!

Egitaraua

Atzerrian lurra garratz, 2022ko urtarrilaren 23a, Irurtzunen.

Atzerrian lurra garratz, 2022ko urtarrilaren 28an, Basaurin.

Atzerrian lurra garratz, 2022ko apirilaren 2an, Azkainen.

Amua, 2022ko urtarrilaren 16am, Markina-Xemeinen.