Gabonetako soinuak 2021, abenduaren 19an, Bilbon

Bizkaie! 2021-12-09 08:55   Musikea

Hamabigarrenez batuko dira Bilboko Koral Elkarteko Umeen Korua, Gernikako Gaudeamus Korala eta Leioako Kantika Koraleko ahots gazteak. Bilboko Koral Alkarteak, Bizkaiko Foru Aldundiak, La Caixa Fundazinoak eta CaixaBankek sustatutako ekitaldiak osogai soziokultural handia dau, Eskolan kantari programako kideek be parte hartuko dabelako, alboko palkoetatik abestuz.

Abandoibarrako auditoriumean, Gabonetan inspirautako eta goi-mailako obra koralak dira nagusi errepertorioan. Bilboko Koral Elkarteko ahotsik samurrenek emongo deutse hasierea, Umeen Koruak, hain zuzen be, Jose Luis Ormazabalen zuzendaritzapean eta Alberto Sáez Puente pianista eta organisteak lagunduta Camille Saint-Saënsen Ave Maria ezagunagaz eta gero Jesús Guridiren Madrigal, Allan Naplanen Al Shlosha d 'varim kantu judua eta Greg Gilpinen Mary sat a rockin'g bizia etorriko dira, baita Norberto Almandozek moldatutako Olentzero be.

Ondoren, Gernikak hartuko dau talde bilbotarraren lekukoa, Julia Foruriaren gidaritzapean. Gaudeamus Koralak, Jon Artetxe pianistaz gan, Nerea Quincoces perkusionistea, Pablo Davila klarinetiseta, Gorka Aranguren tronpetistea eta Iñaki Alonso baxu-jotzailea izango ditu ondoan. Alkarregaz, Dante Andreoren Puer Natus, Xabier Sarasolaren Ave Maria, David Azurzak moldatutako Trakatan trakatan, Dante Andreok moldatutako San José Gabon-kanta gaztelaua, Esta noche nace el niño andaluziarra, Jon Artetxek moldatutako White Christmas eta José Bernardo Álvarezen Suite Comercial Navideña jo eta abestuko ditue.

Gero, Kantika Koralak, Basilio Astúlezen gidaritzapean, pianoan Luis Lópezek eta perkusinoan Ander Lekuek lagunduta, Hegoafrikaraino eroango dau publikoa, Michael Joseph Barrettek moldatutako Indodana kantuaren bitartez; Haizea Lorenzo, Enola Arruebarrena, Ninbe Solana eta Maider Biguri bakarlariek abestuko dabe eta Oier Aguirrek perkusinoagaz erritmoa jarriko deutso Efrem Podgaitsen Alleluia kantuari eta Itziar Anguitak eta Ane Pérezek Michael John Trottaren Veni Enmanuel eskainiko dabe. Azkenik, Oierrek eta Itziarrek, Yaiza Santolariagaz eta Haizea Lorenzogaz batera, Darius Limen Echoes of the lost world abestiaz emongo deutse amaierea Leioako koralaren kontzertuari.

Amaitzeko, talde guztiak agertokian dirala, Hator hator abestuko dabe Xabier Sarasolak harmonizauta. Kantu tradizional hau ehun ahotsek baino gehiagok kantauko dabe (euren arteko segurtasun-tarteari eutsiz eta maskarea jantzita), Gabonek eta alkarregaz abesteak eragiten deutsen ilusinoan bat eginda. Xabier Madariagak bideratuko dau hori guztia kontzertuak iraungo dauen ordu eta lauren inguruan, deskantsu barik; sarrerak dagoeneko Euskaldunako leihatilan erosi daitekez, 15 €-ko prezio bakarrean.

Adierazpenak

Lorea Bilbao, Euskera, Kultura eta Kirol Foru Diputaduak adierazo dauenez, Gabonetako Soinuak kontzertuak urtero erakusten dau Bizkaiko ahotsek etorkizuna dabela: gaztetasuna, talentua eta kalidadea bermatuta dagoz abenduaren 19an.

Ana Garibi, CaixaBankeko Ekintza Arduraduna iparraldean: La Caixa Fundazinoaren eta CaixaBanken arteko lankidetzeari esker, Euskadin kolektibo indargei laguntzen deutsen milaka gizarte-erakunde solidariok Fundazinoaren dirulaguntzak jaso leikiez. Urrutira joan barik, CaixaBankek, La Caixa Fundazinoak lagatako aurrekontuaren bidez, 2020. urtean 1,8 miloe euro baino gehiago erabili zituan Euskadin tokiko gizarte-proiektuetarako eta, holan, 323 ekimen jorratu ziran CaixaBanken bulego-sarearen bidez bideratutako euskal gizarte-erakundeakaz batera. Horren adibide, Eskolan kantari proiektua, izan be, urteak daroaz beharrean, lurraldeko ehunka umek musikearen munduaezagutu deien.

Iñigo Alberdi, Bilboko Koral Alkartearen kudeatzailearen eretxiz, alkarlanak inoiz baino zentzu gehiago dauka. Koruak batu eta abesteak, prebentzio neurri guztiak jarraituz, talde bezela indartu egiten gaitu eta gizarte bezela sendotu. Eskolan Kantari proiektua Gabonetako Soinuak kontzertuaren parte bilakatzea azken urteetako nobedade pozgarria da. Eskerrik asko erakunde, abeslari, familia eta zentru guztiei.

Informazino gehiago

Kantika Korala: 50 koralista (12 - 20 urte).

Gaudeamus Korala: 50 koralista (9 - 30 urte).

Bilboko Koral Alkartea: 60 koralista (7 - 17 urte).

Eskolan Kantari. 90 koralista (9 - 12 urte).

Deusto Eskolea; Uribarri Eskolea; Basauri Basozelai; Angeles Custodios Ikastetxea; San Pedro Apostol Ikastetxea; Tiboli Eskolea; eta Mujika Eskolea.