Autortzea gida-txakurrei, 'ikusten ez dabenen begiak' diralako

Gida-txakurra eta kumeak (argazkiak: ONCE) | Ikusi handiago | Argazki originala

Gaur, apirilak 28, Gida-txakurren Nazinoarteko Eguna danez, ONCE-Euskadi erakundeak laguntzaile fin eta leial horreen lana autortu eta gizarteratu nahi dau. Joan-etorrietan segurtasuna eta mobikortasuna emoten deutse txakurrek itsuei edo ikusteko arazoak dituenei, eta ONCEren profesionalen ahaleginari esker, pandemia bete-betean be, supermerkadu, botika, osasun-etxe eta autobusetan ibili leitekez.

Izan be, ikusten ez dabenen begiak dira gida-txakurrak, ONCE-Euskadik adierazo dauenez. Gizarteari gogoratu eragin deutso oso garrantzitsuak dirala legeek gida-txakurren erabiltzaileei eskaintzen deutsiezan espazio, establezimendu eta erabilera publikoetarako eskubidea errespetetea. 

Gaur egun, Euskal Autonomia Erkidegoan 30 gida-txakur dagoz. Gehien Gipuzkoan dagoz, hamabost; Bizkaian hamabi dira eta Araban, hiru.

Behar daben persona guztiei gida-txakurra emoteko baliabideak lortzeko asmoz, ONCEk kanpainea ipini dau martxan, Gida-txakurraren Nazinoarteko Egunaren kontura. Herritarrak gida-txakurren lagun egin leitekez, dohaintzak emonda. 

Ganera, ONCEren apirilaren 28ko zozketako kupoia gida-txakurren omenezkoa da. Txakurkume bat agiri da kupoian, herritarrei laguntzinoa eskatzen. Era horretara, gida-txakurren funtsezko zeregina gogoratzeaz gan, kanpaineagaz bat egiteko deia zabaldu dau ONCEk. 5,5 miloe kupoi ipini ditue salgai.