Emakume gehiago zientzian

| Ikusi handiago | Argazki originala

Donostia International Physics Center (DIPC), CIC nanoGUNE ikerketa-zentroa, Materialen Fisika Zentroa (CFM CSIC-UPV/EHU), CIC biomaGUNE, Biodonostia, Tecnun-Escuela de Ingeniería, Ceit, POLYMAT, Elhuyar, UPV/EHUko Informatika Fakultadea eta Eureka! Zientzia Museoak zientzia-programazino bateratua aurkeztu dabe, mundu osoan zezeilaren 11n ospatzen dan Emakume eta Neska Zientzialarien Nazinoarteko Eguna ospatzeko. Egun horretatik aurrera eta Donostian, hilebete osoan zehar egingo dira Emakumeak Zientzian 2021 ekimenaren ekintzak: tailerrak, berbaldiak, esperimentuak familian, bisita birtualak eta bestelakoak.

Ekintza horreetako asko online egingo dira osasun larrialdia dala eta. Ekimenaren helburua da zientzian dabizen emakumeen lana ikusarazotea, jarduera zientifiko-teknikoak gizonezkoen kontua diralako ustea apurtzea eta neskek eta nerabeek zientziako ikasketak hautatu deiezan sustatzea. Emakumeak Zientzian 2021 ekimenak Gipuzkoako Foru Aldundiaren, Donostiako Sustapenaren, Zientzia Ikerketarako Kontseilu Nagusiaren (CSIC) eta Zientzia eta Teknologiarako Espainiako Fundazinoaren (FECYT) babesa dau.

Elhuyarren Emakumeak zientzialari erakusketea zabalik dago Eureka! Zientzia Museoan.

Zezeilaren 11n, Contagio (Steven Soderbergh, 2011) proiekzino berezia izango da, Itziar Pérez Donostialdeko Osakidetzako kudeatzaileak aurkeztuta, DIPCk, Euskadiko Filmategiak eta Donostiako Zinemaldiak antolatzen daben Zinema eta Zientzia Zikloaren barruan. Errealismo handiz, filma hamar urteren buruan aurreratzen da eta gure mundu hiperkonektau eta globalizatuak munduko pandemia batean izan leikezan fase guztiak aztertzen ditu. Zezeilaren 13an, zapatuan, saioa Bilboko Arte Eder Museoan be egingo da.

Zezeilaren 12an, 18:00etan, Emakume zientzialariak atzo eta gaur zientzia-ekitaldia egingo da Eureka! Zientzia Museoan. Donostiako hainbat zentrotan lan egiten daben bost emakumezko zientzialari Eureka! Museoan izango dira martxan dituen ikerketei buruz berba egiteko eta historiako emakume zientzialari handietako batzuk omentzeko, haree bizitza liluragarrien eta ekarpen zientifikoen kontakizunaren bidez. Berbaldiak streaming bidez jarraitu daitekez. Emakumeak ondokoak dira: Fátima Villa (Tecnun) & Neri Oxmam, Ester Verde (CFM) & Carmen Mijangos, Naiara Aginako Bengoa (Informatika Fakultadea, UPV/EHU) & Hedy Lamarr, Ane Ruiz de Angulo (CIC biomaGUNE) & Gertruelion de Belle eta Elisa Jimenez (UPV/EHU, DIPC, Ikerbasque) & Rachel Carson.

Aurten, gainera, Ane Leux musikari donostiarrak eta Tineke van Der Berg zientzialari holandarrak zuzeneko musikea eskainiko dabe.

Astegoienean, zezeilaren 20an eta 21ean, familien txandea izango da. Zientziaren izarrak jardueran, Elhuyarrek atondutako emakumezko zientzialarien 12 kontakizunetatik abiatuta, zientzia-esperimentuak egingo dira familian Eureka! Zientzia Museoan emakume zientzialari edo zientziaren izar horreen omenez.
Programazinoan badira hezkuntza-jarduerak be —online zein aurrez aurrekoak— zientziaren mundua ume eta gazteei hurreratzeko eta emakume zientzialarien eginkizuna ikusarazoteko: Zezeilaren 17an, Biodonostia Osasun Ikerketarako Institutuak Covid 19-a zelan diagnostiketan dan ikasi tailerra eskainiko dau, DBHko ikasleek bertatik bertara ezagutu deiezan Covid-19a atzemoteko laborategiko teknika nagusiak. Zezeilaren 19an, Tecnun eta Ceit-en egingo dan Injineru izaten olgetan tailerrean DBHko 4. mailako neska-mutilek hartuko dabe parte; tailerraren helburua da injinerutzea gazteei modu praktikoan hurreratzea eta nesken artean STEM ikasketak ezagutarazotea. Zezeilaren 22an eta 25ean, UPV/EHUko Informatika Fakultadeak Informatika ipuin eta magia bidez atonduko dau, lehenengo hezkuntzako ikasleakaz kodigo bitarra eta algoritmoa landuko dituan tailer dibertigarria. Zezeilaren 25ean, biomaGUNEk tailer praktiko bat eskainiko dau bokazino zientifiko barriak motibetako.

DIPC, CFM eta CIC biomaGUNE ikerketa-zentroak bertatik bertara ezagutzeko bisita birtualak be izango dira, ikertzaileen eguneroko bizitzea hurretik ikusi ahal izateko. Zentroetako ikertzaileek hainbat jarduera eta erakustaldi egingo ditue, emakumeek zientzian daben zeregina nabarmentzeko. Topaketa birtual horreei esker, parte-hartzaileek zientzialarieakaz olgetako aukerea izango dabe.

Azkenik, Emakumeak Zientzian 2021 ekimenaren barruan, zenbait nerabek zientzialari izateko aukerea izan dabe egun batez, CIC nanoGUNE eta POLYMATeko ikertzaileek gidatuta; horreen guztien laguntzeagaz eta Zientzia bada nesken kontua izenburupean, nanozientziagaz, nanoteknologiagaz eta polimeroakaz lotutako hainbat esperimentu erakargarri atondu ditue. Era berean, aspalditik dabiz emakume helduek kulturearen transmisinoan daben zeregina balioesten. Espiritu horri eutsiz eta Esperientziaren boterea izenburupean, zenbait esperimentu labur eta erraz eskainiko ditue, edozein lekutan egiteko modukoak, kultura zientifikoa familietan eta gure inguruneetan ibili daiten.

Aurrez aurreko jarduera guztiak beharrezko osasun neurriakaz egingo dira. Zenbait jardueratarako —aurrez aurrekoak zein onlinekoak—, izena emon behar da eta Emakumeak Zientzian 2021 webgunean emon daiteke izena hemen.