Àlex Rigolaren 'Macho Man' aurkeztu dabe Bilbon

Bizkaie! 2020-03-04 08:03   Kulturea

Gaurtik martiaren 15era, Azkuna Zentroak, Bilboko Udalaren Gizarte eta Kultura Garaikideko Zentroak, HeartBreak Hotel konpainiaren Macho Man aurkeztuko dau Kulturen Atarian, Àlex Rigola dramaturgoaren azken proposamena. Proiektua Bilboko Udaleko Bardintasun Sailaren eta Emakunde Emakumearen Euskal Erakundearen laguntzinoagaz gauzatu da.

Bilboko Alkate Juan Mari Aburtok (Azkuna Zentroko ohorezko presidentea), Gonzalo Olabarriak (Kulturako zinegotzia eta Azkuna Zentroko presidentea), Gotzone Sagarduik (Azkuna Zentroko presidenteordea), Nekane Alonsok (Bilboko Udaleko Bardintasunerako zinegotzia), Izaskun Landaidak (Emakundeko), Fernando Pérezek (Azkuna Zentroko zuzendaria), Alex Rigolak (piezearen egilea) eta Administrazino Kontseiluko kideak bisitau dabe gaur gatxaren biktima potentzial danakazko enpatia bilatzen dauen indarkeria matxisteari aurre egiteko antzerki-dokumentu instalazinoa.

Alex Rigola dramaturgoak gizartea kontzientzietako kulturearen bidea erabilteko egindako ahaleginaren ondorioa da Macho Man: Gure ezagutza dramatikoa erabiltea erabagi dogu, ikusle bakotxean eragin eta orbaina ixteko, ikusle guztiek gogoratu deien ze jazoten dan indarkeria matxisteagaz azaldu dau Alex Rigola instalazinoaren arduradunak. Rigolaren eretxiz, matxismoa, txisteak, iruzkinak edo indarkeria matxistearen egoerak pasetan ixten doguz askotan eta horregaitik jarri nahi izan deutsagu ispilu bat gizarteari, zeozer aldatu eta hobeak izan geinkezalako'

Macho Man-en dramaturgia modu kolektiboan landu dabe Ferran Dordalek, Alba Pujolek, Irene Vicente Salasek eta Àlex Rigolak berak osotutako taldeagaz. Argi eben zein izan behar eban ikuspegia: emakumeak ardatz eta ez erasotzaileak. Aretoetako batean, ikuslea genero-indarkeriaren biktimen argazkiz inguratuta dagoala, sortzen dan inpaktu emozionalak argi azaltzen dau erabagi hori: hor, dagoeneko ez dagozan beste gorputz batzuen aurrean, enpatia berehalakoa da.

Edegitako zauria argi erakutsi gura eben. Rigolak dinoanez, makurra dan zeozer dago mueta honetako erasoakaz lotutako albisteen metaketan. Guk danok, ikusle eta irakurle garen aldetik, datuak metatzen ditugu eta, horren ondorioz, galdu egiten dogu orainaren eta errealidadearen nozinoa.

Biktima baten ahotsak gidatuko ditu bisitariak 12 gelaz osotutako artefaktu dramaturgiko honen ibilbide labirintikoan. Artefaktua erabat bildurgarria da, erakusten deuskun guztia egia hutsa baita. Benetakoak dira datuak, epaiak, adierazpenak eta galderak eta benetakoak dira alkarrizketak.

Arteen bat-egitearen bidez beste narrazino modu batzuk proponiduten dituan proiektu hau aurrera eroateko, Àlex Rigolak dokumentazinoa batzeko 10 hilabete behar izan zituan, baita Alba Alfageme psikologoaren aholkularitzea be.

Macho Man esperientzia eszeniko interaktiboa bidaia eszeniko, esperimental eta emozionala da, bikotearen, familiaren eta lan, gizarte eta justizia-inguruneen indarkeria matxisteari buruz kontzientziau nahi dauena: Proiektu honegaz, bide barriak bilatzen ditugu muturreko matxismoaz kontzientzia hartzeko, arte eszenikoetako, arte plastikoetako, psikologiako eta dokumentazinoko jakintzak bateratuz. Ikusleak aktibau nahi ditugu, dokumental, informazimoko flyer edo erakusketa batek egingo leuken horretatik harantz jota azaldu dau Àlex Rigolak.

Holan, 50 minutu inguruko ibilbide batean, sei laguneko taldeak, gehienez, topetan dituen objektuakaz eta gainerako parte-hartzaileakaz paseau, irakurri, entzun eta alkarreraginean ibiliko dira, Macho Man-en publikoaren erreakzinoak esperientziaren parte bihurtzen baitira. Instalazinoko areto bakotxak bere izakerea dau, baita interakzino-mekanismo propioa be.

Emozinoak iraultzen dituan bidaia da, ikusleak hunkitzen dituana, jenteak uste genduana baino hunkituago urtetan dau, dino Rigolak. Macho Man hezkuntza-esperientzia be bada eta, horregaitik, ikastetxeetara zabalduko da, alkarrizketea eta hausnarketea sortzeko asmoz. Izan be, Rigolak dinoanez, indarkeria matxistea gizarte-arazo larria da, desagertarazo egin behar dana eta hori egiteko modurik onena hezkuntzearen bidez da. Indarkeria iraunkor eta instrumental horren datuak adierazgarriak dira, izan be, emakumeen heriotza-eragile gogor nagusia da, eta emakumeentzako segurtasun-ezaren arrazoi nagusia.

Indarkeria matxistearen benetako testigantzak dituan instalazinoa danez, persona batzuen sensibilidadea mindu leike eta horregaitik ez da gomendagarria 15 urtetik beherakoentzat.

Alex Rigola

Eszenako zuzendaria eta dramaturgoa da. Who is me. Pasolini eta Vania lan txalotuak be abiarazo zituan. HeartBreak Hotel arte eszenikoen konpainiaren sortzaile eta zuzendariak ondokoa aretoak be zuzendu ditu: Madrilgo Teatros del Canal (2017 eta 2018an), La Biennale di Veneziako antzerki-atala (2010 eta 2016 bitartean) eta Bartzelonako Teatre Lliure (2003 eta 2011 bitartean).

Rigolak bere ikuskizunakaz birea egin dau Frantzia, Italia, Alemania, Austria, Portugal, Espainia, Errusia, Bosnia, Hungaria, Polonia, Errumania, Txile, Venezuela, Kolonbia, Mexiko, Taiwan eta Australiatik.

Macho Man

Martiaren 2tik martiaren 15era (martiaren 8an eta 9an zarratuta).

Ordutegiak: Saioen hasierea: 17:00etan / 17:30ean / 18:00retan / 18:30ean / 19:00retan / 19:30ean / 20:00retan.

Sarrerak: 10€ / 8€ AZ txartelagaz. 40€ taldeentzat.

Taldeak: eskola zentroakaz eta taldeakaz berbatuta. Informazino gehiago: 944014014.

Antzerki-dokumentu instalazino honek indarkeria matxistearen benetako testigantzak jasoten ditu. Persona batzuen sensibilidadea mindu leike. Ez da gomendagarria 15 urtetik beherakoentzat.