Ryszard Kapuscinskiren 'Kristo fusilarekin', euskeraz

| Ikusi handiago | Argazki originala

XX. mendeko autorerik ezagunenen artean sartu eban Kristo fusilarekin liburuak Ryszard Kapuscinski. 1975ean argitaratu eban, jatorriz polonieraz, mundu osoko gatazketako gerrillari eta burrukalari ospetsu zein ezezagunen barri emoteko. Mozanbiken, Palestinan, Amerikan... ibili zan Kapuscinski istorioak batzen, eta han ikusitakoa da liburuko erreportajeen oinarria.

Katakrak argitaletxearen ekimenez eta Amaia Apalauzaren itzulpenari esker, euskeraz irakurri leiteke Kristo fusilarekin. Hedoi Etxarte Katakrakeko editoreak azaldu dauenez, gerrillariaren figurea lantzen dau Kapuscinskik erreportaje bilduma horretan, hurragoko irudia emoteaz gan, gogoetea eragiteko asmoz. Gerrillarien, biolentziaren eta kazetaritzearen beraren inguruko gogoetea, hain zuzen.

Amaia Apalauzak zehaztu dauenez, hiru zati nagusi ditu liburuak. Palestinako gatazkea da lehenengo parteko ardatza, eta, itzultzailearen ustez, azken hamarkadetan Ekialde Hurreko inguru haretan jazoten danaren giltzarriak ederto batzen ditu.

Bigarren zatian, Latinoamerikara begiratzen dau Kapuscinskik. Hainbat herrialdetako kronikak idatzi zituan, berbarako, El Salvador, Guatemala, Haiti eta Boliviakoak. Militarrek Hego Amerikan daben poterea eta estadu kolpeak emoteko erraztasuna salatu zituala, eta egunotan Bolivian jazoten dabilena ulertzeko balio dauela dino Apalauzak.

Azkenik, Mozanbikeko independentzia gerrearen inguruko atala dator. Afrikako herrialde ugaritan ibili zan Kapuscinski luzaroan, baina Mozanbikeko kontuak aitatu zituan gehienbat Kristo fusilarekin-en. Apalauzaren esanetan, alkarregandik urrun dagozan gerren arteko loturea egiten da liburuan.

Euskerazko edizino honek, ganera, beste sorpresatxu bat dakar irakurlearentzat. Ane Irazabalek, nazinoarteko kazetaritzan aditua dan kazetariak, berbaurrea idatzi dau. Kapuscinskiren inguruko jakingarri ugari aitatzen ditu Irazabalek; esate baterako, politikariak eta jente potereduna alkarrizketatzea ez ebala gogoko, gurago eban ahotsik bakoei kasu egin eta euren ikuspegia zabaldu.