Bilboko Musika Eskoleak bere zaindaria, Santa Zezilia omenduko dau

| Ikusi handiago | Argazki originala

Santa Zezilia musikearen zaindariaren jaiaren harian, zemendiaren 21ean ospatzen baita, Bilboko Udalaren Musika Eskoleak hainbat jarduera antolatu ditu datorren eguaztenerako, hilaren 21erako, era askotakoak, eta ikus-entzule mueta guztientzat.

Jardunaldia umeentzako kontzertu bategaz hasiko da, 17:15ean, Santutxun, Bilbao Musika – La Galeran (Sorkunde kalea, 8), Trakamatrakaren eskutik, musikea eta birziklatzea, sormena eta irudimena, askotariko musikea eta ingurumenaren alderako begirunea batzen dituan proiektu bategaz.

Ondoren (18:00etatik aurrera), entzunaldi-kontzertu bat izango da Eskolako ikasleen eskutik, Bilbao Musika auditorioan, eta, ordu berean, txistulari taldeek Zazpi Kaleak eta inguruak girotuko ditue kalejira bategaz. Eta, 19:30ean, Bira Tabernan (Erronda kalea, 2), Jam Session bat izango da.

Azkenik, arratsaldean zehar, harizko musika-tresna bat zelan egiten dan agertzeko erakustaldi bat izango da, Lutheria Sarrikoren eskutik, Bilbao Musikaren 102 gelan.