Kultura ondarea gazteen artean zabaltzeko hitzarmena

Leire Acha eta Lorea Bilbao, hitzarmena sinatzen (argazkia: BFA) | Ikusi handiago | Argazki originala

Bizkaiko Foru Aldundiak eta Unesco Etxeak indarrak batu ditue ondare kulturalari eta horren aniztasunari balioa emoteko, batez be gazteen artean. Lankidetza-protokoloa sinatu dabe, zeregin horretan alkarregaz jarduteko.

Lankidetzearen helburua da, gazteak ondarea jagon, errespetau eta baloretearen inguruan sensibilizetea, adierazo dau Lorea Bilbao Bizkaiko Euskera eta Kultura diputaduak. Horregaitik, gazteek tresna egokiak euki deiezela nahi dogu, kultura ondarearen garrantzia ulertu eta ondo kudeatu deien, bakotxak bere esparrutik. Unesco Etxearen partetik, Arantza Acha zuzendariak sinatu dau hitzarmena.

Erakunde bien arteko akordioaren ondorioz antolatutako lehenengo ekimenaren barri be emon dabe. Ondare Up izena emon deutsie. Ondarearen eta kultura dibersidadearen ezagutzea sustatzea helburu dauen tresna didaktikoa da. Gailu eroangarrietan erabilteko moduko aplikazinoa dauka Ondare Up-ek, eta pantaila handietarako web bersinoa be bai.

Aplikazinoa Vedi Studiogaz lankidetzan eta Bizkaiko Foru Aldundiaren eta Garapenerako Lankidetzearen Euskal Agentziaren babesean garatu dabe. Web bersinoa, ostera, www.ondareup.org helbidean topau leiteke.

Interfaze erakargarri baten bidez, gazteei ondare kulturalaren inguruko jakinmina biztuko deutsien erronkak dakarz Ondare Up-ek. Hezkuntza formal zein ez-formaleko profesionalen lana erraztuko dau, ikasgeletan eta gizarte eta hezkuntza arloko bestelako espazioetan tresna horreek erraz txertatu ahal izan deiezen.

Bizkaiko Foru Aldundiaren eta Unesco Etxearen arteko lankidetzeak, bestetik, ondarearen eta  aniztasunaren aldeko boluntariotzea bultzatuko dau gazteen artean. Beka bana emon deutsie Leyre Martinez eta Dani Ortiz de Lanzagorta gazteei. Biek lagundu dabe Ondare Up Portugaleteko eta Getxoko gazteen astialdi guneetara zabaltzen.

Hitzarmena eta beronen ondorio dan Ondare Up tresna didaktikoa, Madrilen aurkeztuko ditue, zemendiaren 14tik 16ra egingo dan Hezkuntza Ondarearen Nazinoarteko IV. Biltzarrean. Leyre Martinez eta Dani Ortiz de Lanzagorta bekadunak eta Unesco Etxeko Jessica Dominguez izango dira Bizkaiaren ordezkari. Antzeko proiektuak ezagutzeko aukerea izango dabe han.