Emakumeak protagonista, Plentziako II. Agorrijazz jaialdian

Noa Lur | Ikusi handiago | Argazki originala

Igazko lehenengo edizinoak emondako emoitza ona gogoan, Plentziako Udalak barriro antolatu dau Agorrijazz jaialdia, plentziarrei eta bisitariei jazz musikarik onena hurreratzeko asmoz. Barikuan eta zapatuan izango dira kontzertuak, Ontziola plazan.

Aurtengo egitarauan, emakumeek egindako musikeari emon deutsie lehentasuna. Era horretara, Ekuru taldeak zabalduko dau Agorrijazz, barikuan 20:00etan. Durangoko banda horretan, Irati Bilbaoren lana nabarmendu leiteke, gizonezko taldekideak be badagozan arren. Blue Blues izeneko diskoko piezak joko ditue. Egun berean, 22:00etan, Goizargi Gospel Choir entzun ahal izango dogu Ontziola plazan, hamabost ahots bikainez osotutako korua.

Zapatuan, goi mailako bakarlari bik hartuko dabe parte jaialdian. Lehenengo, 20:00etan, Noa Lur bilbotarrak igongo dau oholtzara eta 22:00etan, Susan Santosen txandea izango da. Ganera, egun bietan, Bahía de Plentzia hotelean jam session saioak egongo dira gauerdian.