Balmasedan egingo da Euskal Herriko I. Cittaslow Azokea

| Ikusi handiago | Argazki originala

Bagilaren 1ean eta 2an, Balmasedak harrerea egingo deutso Cittaslowren Estaduko Batzordeari eta Euskal Herriko lehenengo Cittaslow azokea antolatuko dau San Juan plazan. Azoka horretan, danetik izango da: kulturea, tradizinoa eta nortasuna.

Bagilaren 1ean, 14:00etan, ondoetorria egingo jake bertaratzen diran lagunei Balmasedako Kultur Etxean; 15:30etik 17:00etara bisitaldi gidatua izango dabe Balmasedan; eta 17:00etan harrerea egingo deutsie udaletxean, ohorezko aurresku eta guzti. Ondoren, 21:30ean, Marabaos musika taldearen zuzeneko emonaldia izango da Maiken Brewery-n.

Zapatuan, bagilaren 2an, 12:00etatik 14:00etara eta 17:00etatik 20:00etara, Cittaslow Azokea egingo da San Juan plazan. 13:00etan, Mungiako Izenaduba Basoaren kalejirea izango da (euskal mitologiako pertsonaien desfilea). 13:30ean, Palseko arroza eta Bubióngo gozoki tipikoak probetako aukerea egongo da, eta, azkenik, 19:30ean, Begurreko cremat edari tipikoa banatuko da.

Udalerrien erakusketea San Juan plazan egongo da eta bat etorriko da Cittaslowren Estaduko Koordinazino Batzordearen batzarragaz: zapatu goizean, espainiar estaduko Cittaslow udalerrietako alkate eta zinegotziak batuko dira. 'Cittaslow bizi-kalidadearen markea indartu gura dogu', gogorarazo dau Cittaslow Bizi Kalidadearen aldeko Udalerrien Sareko presidente eta nazinoarteko presidenteorde Joan Loureirok.

Honako honeek bertan izatea espero da: Álvaro Parro, Balmasedako alkatea; Begurreko alkate eta Cittaslowren Espainiako sareko egungo presidentea, eta Francesc Pilsà, Begurreko zinegotzia; Sílvia Monar, Palseko zinegotzia eta erakundeko idazkaria estadu-mailan; Margarida Camprubí, Beguesko hirugarren alkateordea; Ager Izagirre, Mungiako alkatea; Alaitz Erkoreka, Mungiako Udaleko zinegotzia eta alkarteko diruzaina; Mari Carmen Pérez, Bubióngo alkatea; Raúl Ruiz Álvarez, Granadako Alpujarrako Udalerrien Mankomunidadeko lehen presidenteordea; Koldo Goitia, Lekeitioko alkatea; Rosa M. Pedret, erakundeko administrazino-kudeatzailea; eta Albert Costa, alkarteko kudeatzaile teknikoa.

Balmasedako alkate Álvaro Parroren berbetan: Udalerrien Sarearen erronka nagusietako bat da Cittaslow proiektua sustatzea uri-proiektu legetxe, eta, horren barruan, bizi-kalidadea eta tradizinakazko, nortasunagazko eta baliakazko maitasuna sendotzea zeharkako hainbat esparrutan, besteak beste, hezkuntzan, ingurumenean eta gizarte-aurrerabidean.


Espainiar estaduko Cittaslow sarea

Cittaslow sarea 2003an sortu zan, Palafrugell-en ekimenez. Hasiera-hasieratik, Palafrugell, Pals eta Begur lanean hasi ziran mobimentura batzeko, bizi-filosofia horregazko interesa erakutsi eben espainiar estaduko beste udalerri batzuekaz batera. Azkenik, 2008an, Mungia, Lekeitio, Rubielos de Mora, Begur eta Palsek Slow udalerrien ziurtagiri ofiziala jaso eta Cittaslow alkartea-Espainiar Estaduko Bizi Kalidadearen aldeko Udalerrien Sarea sortu zan.

Aitatutako udalerriez gan, sarean sartu dira Begues, Morella eta Balmaseda. Cittaslow mobimentua Italian jarri zan abian, 1999an, egungo bizi-erritmo frenetikoari aurre egiteko asmoz. Uri lasaien eta ondo bizitearen alde egiten dau, eta estresaren kontra burrukatzen. Bada, urte gitxitan mobimentua 5 kontinenteetara zabaldu da. Aurreikusita dago bagilean Granadako Alpujarrako Bubión udalerria eta Tenerifeko La Orotava uribildua sarean sartzea.