Egun bi izango ditu Bilboko Gau Zuriak

Dabi Piedra 2018-05-31 12:09 Kulturea

Bagilaren 15ean eta 16an ikuskizun ugari egongo dira uriko kale eta eraikinetan.

Josune Ariztondo, Gau Zuriaren aurkezpenean | Ikusi handiago | Argazki originala

Sortu zanetik, urtero gau bakarra hartzen izan dau Gau Zuriak, Bilboko uribilduaren sorrerearen urteurrenaren inguruko data baten. Aurten, ostera, egitaraua bikoxtea erabagi dau Bilbao 700 Fundazinoak, herritarrek ikuskizun guztiak disfrutetako aukerea izan deien. Era horretara, bagilaren 15eko ekitaldi gehienak barriro egongo dira 16an.

Aurreko edizinoetako esperientzietan oinarrituta erabagi dabe Gau Zuria egun bira luzatzea, Josune Ariztondo Bilbao 700 Fundazinoko zuzendariaren arabera. Jente askok esan deutse gaueko ekitaldi guztiak ikusteko astirik ez dauela emoten eta eguraldi ona badago pilaketa handiak egoten dira.

Aurten uriko 30 espazio ingurutan beste horrenbeste ikuskizun antolatu ditue. Itsasadarraren alboan ibiliko gara, Atxuritik Itsas Museora, eta barrura be egingo dogu, Indautxura, azaldu dau Ariztondok. Danetarikoak izango doguz: bisitaldi antzeztuak, musikea, argi eta soinu ikuskizunak...

Bilboren 318. urteurrena ospatzeko antolatzen dabe Gau Zuria, baina oraingoan beste efemeride batzuk gogoan izango ditue. Euskaltzaindiak eta Indautxuko Serrano ikastetxeak 100 urte beteko dituenez, eguzkilorez apainduko ditue Akademiaren egoitzearen balkoiak eta koloretako mapping handia proiektauko dabe eskolearen eraikinean. Era berean, Arte Eder Museoaren 110 urte, 110 artelan erakusketeagaz bat egingo dau Gau Zuriak, musika klasikoko kontzertu baten bidez.

Guggenheim Museoko Magia Txokoak izan ezik (horreek hilaren 16an baino ez ditue egingo), jarduera eta ikuskizun guztiak egun bietan errepetiduko dira. Kasu batzuetan, baina, egun bateko eta besteko egitaraua pixka bat desbardina izango da. Esate baterako, Santiago plazako abesbatzen kontzertuetan, Bilboko Akordeoi Orkestra Sinfonikoa eta San Anton korua egongo dira barikuan; eta Koral Alkartea eta San Antonio Iralabarri abesbatzea zapatuan.

Josune Ariztondok azpimarratu dau Gau Zuriko ekintzak doban dirala. Egitaraua eta ordutegiak, hemen.

2018ko Gau Zuriaren kartelak Elena Odriozolak diseinau ditu.