Juan Cruz de Eguileorren biografia argitaratu dau Bilbao 700 Fundazinoak

Bilboko udaletxean aurkeztu dabe liburua (argazkia: Bilboko Udala) | Ikusi handiago | Argazki originala

Bilboren historian ekarpen esanguratsuak egindako gizon zein emakumeen bizitzea eta nortasuna gogora ekarteko helburua dauen bildumea da Bilbogileak. Horren barruan, Bilbao 700 Fundazinoak, Bilboko Udalaren laguntzinoagaz, Juan Cruz de Eguileorren biografia plazaratu dau, batez be, nekazaritzearen modernizazinoan izan eban eragina aintzat hartuta.

Juan Cruz de Eguileor Abandon jaio zan 1840an, herria eleizate independentea zanean. 1920an hil zan, Bilbon. Bizkaiko lehen sektorearen orainagaz eta etorkizunagaz lotutako ibilbidea izan ebala azpimarratu dabe liburuaren aurkezpenean.

Izan be, Europako nekazaritza barriaren teknikak apliketan lehenengoetarikoa izan zan Abandoko lursailetan, gaur egun Autonomia kalea dagoan inguruan. Agronomia-peritu aitzindaria izan zan, fruta-arbolen atalean, espezie exotikoetan zein lorazaintzan aditua.

Ganera, Eguileor Abandoko alkatea izan zan 1880ko hamarkadan. Kargu horretan egoala, nekazaritza-teknika barriak apliketako eremua sortu eban herrian eta 36 hektarea lursail banatu zituan, salmentan eta alokairuan.

Bilboko alkate Juan Mari Aburtoren esanetan, Eguileorrek gogora ekarri eban ze garrantzitsuak diran euren zuztarren loturak lurragaz eta sarri zokoratzen dan lehen sektoreagaz. Bilbao 700eko Josune Ariztondok ganeratu dau Eguileor familiak belaunaldiz belaunaldi jagondako bitxiaren emoitzea dala liburua.

Joseba Eguiraun Benedicto eta Imanol San José Azueta dira liburuaren egileak. Euskerazko eta gaztelaniazko edizinoak atera ditue.