Hegazti Migratzaileen Eguna ospatuko dabe domekan

| Ikusi handiago | Argazki originala

Urtero legez, maiatzaren bigarren astean Hegazti Migratzaileen Eguna ospatzen da munduan. Egun horri lotuta, hainbat jarduera atonduko ditu Urdaibai Bird Center-ek. Gaia hegaztien, migrazinoen eta personen arteko loturak izango dira. Egitasmoak hegazti mueta honeek eta bere habitat-ak konserbatzeko hezkuntzea aurrera eroatea dau helburu.

Ospakizun egun honi hasierea emoteko, domekan, maiatzak 13, Urdaibai Bird Center-ek ate edegien eguna atondu dau.

Egunean zehar, dobako bisitaldiak egingo ditue eta baita eraztunketa zientifikoa erakusteko saio bat be, goizean. Hau guztia hegaztien migrazinoaren ganean eta gertakari horrek Urdaibaiko Biosfera Erreserban dauen garrantziari buruz gehiago jakin nahi dauenari zuzenduta egongo da.

Egun honetan parte hartzen dabenek, bai zentrotik bertatik eta bai Gautegiz Arteagako paduretan kokaturiko behatokietatik, hegaztien behaketa saio bat ikusi ahal izango dabe. Egun honeek hegazti askorentzat, Europa iparraldeko ugalketa lekuetarantz eztei-aurreko migrazino sasoiagaz bat egiten dabe. Holandarantz doazan mokozabalak, lertxunak eta hainbat ur hegazti ikusteko aukerea izango da. Antolatzaileek nabarmendu dabenez, egunotan, gurera etorri diran arrano arrantzaleek ikuskizun politak eskaintzen ibili dira.

Batu daiguzan gure ahotsak hegaztien konserbazinoaren alde da egun hau ospatzeko aukeratu daben leloa, holan, Hegazti Migratzaileen Munduko egunak, animalia honeen konserbazinoa eta tokian tokiko komunidadeen garapena dau asmoa.

Modu berean, eguenean, maiatzak 17, Montorre Herri Eskoleak hegaztien migrazino bidean dagozan beste eskolen arteko nazinoarteko konexino bat burutuko dau skype bitartez. Bertan, Montorregaz batera Suedia, Holanda, Luxenburgo, Maroko eta Mauritaniako eskolek hartuko dabe parte. Konexinoa ingelesez edota frantsesez egingo da eta eskola-umeak izango dira protagonistak, bakotxak hegaztien ganeko eta euren migrazinoei buruz egindako lanak aurkeztu eta alkar trukatuko ditue.