Berri Txarrak-ek Asia eta Australiako kontzertuen barri emon dau

Berri Txarrak, Bilbon, 'Infrasoinuak' aurkeztu eben egunean | Ikusi handiago | Argazki originala

Euskal Herrian ez eze, atzerrian be gero eta ospe handiagoa dau Berri Txarrak taldeak. Horren erakusgarri da hurrengo asteetarako atondu daben bira luzea, Nafarroako taldea Asia ekialdera eta Australiara eroango dauena. Infrasoinuak diskoa aurkezteko ekitaldian aurreratu eban Berri Txarrak-ek nazinoarteko bira hori, eta dagoeneko data eta leku zehatzak jakinarazo ditue.

Urtarrilaren 26tik zezeilaren 17ra bitartean ibiliko da taldea Asian eta Australian. Lehenengo kontzertua Hego Koreako Busan urian izango da eta hilaren 27an Seul uriburuan joko dabe. Ondoren, Txinara saltoa egingo dabe nafarrek: Beijing, Wuhan, Chongqing eta Macao, Thailandiako Bangkok uriburuan birritan jo aurretik.

Australiako osterea zezeilaren 7tik 11ra bitartekoa izango da eta bertako uririk garrantzitsuenetan egongo dira, Melbournen eta Sidneyn, besteak beste. Amaitzeko, Indonesiako ugarteetan ibiliko dira, Balin, Malang-en eta, azkenik, zezeilaren 17an, Jember-en.

Asia eta Australiako birea Berri Txarrak-en musikea herrialde urrunetan erakusteko aukera aproposa izango da. Infrasoinuak aurkezteko birea, baina, ez da Indonesian amaituko. Iragarritako moduan, handik bueltan, kontzertu bana emongo dabe Madrilen, Barakaldon eta Bartzelonan. Ikusmin handia eragin dau Barakaldoko emonaldiak, BECeko Bizkaia Arenan milazak lagun alkartuko dira martiaren 17an.

Ganera, talde nafarrak aurreratu dauenez, Europako beste uri batzuetan be joko dabe udabarrian: Dublinen maiatzaren 18an, Londresen 19an eta Edinburgon 20an. Oraingoz, horreek dira Infra Tour 2018 biran iragarritako azken kontzertuak.

Estadu Batuetako Colorado estaduan grabau dau Berri Txarrak-ek Infrasoinuak, Bill Stevenson eta Jason Livermore produktoreen The Blasting Room estudioan. Hamar abesti sartu ditue Infrasoinuak izeneko honetan, alkarren artean desbardinak estilo aldetik, baina taldearen ohiko ikutuari eutsita. Entzuten ez doguzan baina egon badagozan hainbat soinu, ahots edo aldarrikapen dagoz munduan, eta horreei erreferentzia egiten deutse izenburuak.