Kirola eta bardintasuna aztergai

Argazkia: Irekia | Ikusi handiago | Argazki originala

Kirol-erakundeak: genero-ikuspegian pentsatu eta onurak sortu jardunaldiei emon deutsie hasierea Bingen Zupiria Kultura eta Hizkuntza Politikako sailburuak eta Izaskun Landaida Emakundeko zuzendariak. Euskal Herrian kirolak bizi dauen egoerearen ganean genero-ikuspegitik hausnartzea dau helburu ekimenak.

Hitzordua Euskadiko Artxibo Historikoan egin dabe, Bilbon, eta 2017ko Bardintasunerako Foroaren barruan atondu dabe; bertan, kirolariek, klubek edo enpresa babesleek parte hartu dabe. Honegaz batera, Eusko Jaurlaritzeak Euskadiko federazino-esparruan bardintasuna lantzen gidea aurkeztu dau.

Eusko Jaurlaritzako Jarduera Fisikoaren eta Kirolaren Zuzendaritzea eta Emakunde izan dira jardunaldiok atontzeko ardurea hartu dabenak eta azaldu dabenez, emakumeak eta genero-ikuspegia kudeaketa-eremu eta erabagiak hartzeko eremu guztietan presente izatea, justizia kontua ez eze, erakundeetan euretan be eragin positiboa dauen onura soziala da.

Jarduera Fisikoaren eta Kirolaren Zuzendaritzearen helburu estrategikoetako bat kirol-eremuan bardintasun erreala sustatzea dala azaldu dabe aurkezpenean. Eusko Jaurlaritzeak irailean aurkeztutako Jarduera Fisikoa eta Kirola 2017 ikerlanak argi erakutsi eban kirol-jarduereari jagokonez dagoan arrakalea emakumezkoen eta gizonezkoen artean. Honen arabera, 13 puntuko aldea dago: gizonen % 70ek eta emakumeen % 57k egiten dabe kirola. Modu berean, 2016an Eusko Jaurlaritzeak sustatutako beste ikerketa baten arabera, kirol-albisteen %10 baino gitxiagok erreparetan deutsie emakumezkoen kirolari. Bardintasun eza kirolaren esparruan agiriko errealidade bat da. Instituzinoetan gagozanoi jagoku honi aurre egitea, atxakia barik, dino Zupiriak.

Landaidak bestalde, genero-politikea jarduera fisikoaren eta kirolaren kudeaketa-politikan sartzea beharrezkoa dala nabarmendu dau. Edade eta baldintza guztietako emakumeak eremu eta maila guztietan sartzeko, parte hartzeko eta ordezkatzeko erabateko bardintasuna bermatu behar da: kirolari izateko, baina baita kudeatzaile, zuzendari, entrenatzaile, teknikari, epaile eta abar izateko be. Horretarako hezkuntzako estrategien erabilerea sustatu behar da, neska-mutilak edozein jarduera-muetatatan normaltasunez sartu daitezan.

Horrezaz gan, Emakundeko zuzendariak nabarmendu dau behar-beharrezkoa dala beste pausu bat emotea kirolaren benetako esanahia berreskuratzeko: Ez da nahikoa bermatzea emakumeek kirola bardintasunean egin leikiela. Gaur egun kirolaren munduan dagozan balio batzuk birplanteau behar dira, izan be, ez dabe bape zerikusirik kirolaren benetako balioakaz, esaterako, errespetua, gainditzea, ahalegina…