Phoenix, Two Door Cinema Club, Die Antwoord eta Fleet Foxes BBK Live jaialdira datoz

Bizkaie! 2016-11-18 09:40 Musikea

Datorren urteko udarako egitaraua zehazten hasi da Bilbao BBK Live jaialdia. Depeche Mode-ri batuko jakoz orain iragarritako lau taldeak.

Two Door Cinema Club izango da Bilbao BBK Liveko kartelburuetako bat | Ikusi handiago | Argazki originala

Garagarrilaren 6tik 8ra egingo da Bilbao BBK Live jaialdiaren 12. edizinoa, Kobetako landetan. Antolatzaileek aurreratu dabenez, bertan izango dira Phoenix, Two Door Cinema Club, Die Antwoord eta Fleet Foxes, laurak be nazinoartean ospe handia lortu daben taldeak.

Orain dala egun batzuk iragarri zan Depeche Mode kartelburua legez, Phoenix taldea be egonda dago Bilbao BBK Liven lehenago. Hain zuzen be, 2014ko edizinoan egon zan Kobetan, emonaldi gogoangarri baten, antolatzaileen esanetan. Aurrekari horregaz, ziur gagoz kementsu etorriko dirala, ganeratu dabe. Musika alternatiboaren alorreko diskorik onenaren Grammy saria irabazi eban Phoenix talde frantziarrak 2009an, Wolfgang Amadeus Phoenix lanari esker.

Jaialdiko beste kartelburu nagusia Two Door Cinema Club irlandarra izango da. Indie pop musikan ezinbesteko bihurtu dan taldea da, antolatzaileen esanetan. Gameshow diskoa aurkezteko birearen barruan helduko da Two Door Cinema Club Bilbora.

Bestetik, Die Antwoord Hego Afrikako talde bat da. 2010ean kaleratutako lehenengo diskoagaz, eszena musikala hankaz gora jarri ebela dinoe Bilbao BBK Liveko arduradunek. Rap-aren, jantzarako doinuen eta zuztardun musikearen nahastea da Die Antwoord-en estiloa. Ondo jagondako estetikea eta zuzeneko indartsuak dira hegoafrikarren ezaugarri nagusiak.

Fleet Foxes taldeak, ostera, bost urteko isilunea eten eta bireari ekin deutso. Bilbo izango da bira horren geltokietako bat, garagarrilean. Estadu Batuetako Seattle uriko talde horrek folk indie estiloa lantzen dau.

Beste alde batetik, Bilbao BBK Liveko arduradunek azaldu dabe, Basoa ekimena barriro egongo dala martxan 2017an, aurtengo edizinoan estreinautako sail horrek arrakastea izan dau eta. Jantzarako gunea da Basoa eta musika elektronikoaren alorreko punta-puntako bost izen bertan izango dirala aurreratu dabe antolatzaileek: Andrew Weatherall, Dan Snaith, DJ Tennis, Alessandro Parlatore eta Marcello Giordani.