Bilboko Koralak gaur ekingo deutso 'Kantau lotsa barik Bilboko Koralagaz' ekimenari

| Ikusi handiago | Argazki originala

Bilboko Koral alkartearen asmoa da bilbotarrei erakustea urian badakigula abesten; horretarako, gaurtik barikura, Kantau lotsa barik Bilboko Koralagaz ekimenari ekingo deutso, gogoa daben guztiek beren trebetasun musikalak probau deiezan.  

Ekimena Yimby Streeten (Uribitarte Erranplak, 1, Albiako Lorategien ondoan) egingo da hurrengo hiru egunetan, 26tik 28ra, eta ondoko honeek hartu dabe bertan eginiko aurkezpen-prentsaurrekoan: Iñigo Alberdi Koraleko kudeatzaileak, Nekane Alonso Bilboko Udaleko Kultur Saileko zinegotziak eta Marian Sandoval Yimbyko ordezkariak. Iñaki Uranga abeslariak edo Gurutze Beitia, Sol Maguna eta Gemma Martínez aktoreek babesa agertu deutsie ekimenari, Koraleko pianoak lagunduta Eres tú abestuz.



Hiru egun honeetan, 18:00etatik 20:00etara, Enrique Azurzak, Koral Alkarteko zuzendariak eta Marta Ubietak, kantu-irakasleak, partaideen ahotsak entzungo ditue, pianoagaz lagunduko deutsee eta euren ahotsen eta ahalmenaren barri emongo deutsee, bai eta hobetzeko aholkuak be; era berean, laguntza eskainiko deutsee nork bere estiloa topau eta landu daian.

Parte hartu nahi dabenek bakarka egin ahal izango dabe, edo bikoteka, eta koruetan be bai Koraleko kantu-eskolako ikasleakaz, horreek eguaztenean eta eguenean hartuko dabelako parte ekimenean, bai eta Euskeria gazteen koruagaz be, barikuan.

Kantau lotsa barik Bilboko Koralagaz jarduerara hureratzen diranek nahi daben kantua abestu ahal izango dabe; era berean, egun bakotxa musikal bati eskainiko jakonez, hori be lantzeko aukerea izango dabe. Eguaztenean, La Traviata izango da, Giuseppe Verdirena; eguenean, Mikel Laboaren Txoria txori; eta barikuan, Lau teilatu, Itoizena. Obra horreetako bakotxa egunari amaierea emoteko abestuko dabe parte hartu nahi daben bertaratuek, Koraleko zenbait abeslarik lagunduta.

Parte-hartzaile guztien artean, bi laguntzeko sarrera bi zozketatuko dira Koralak eta Bilboko Orkestra Sinfonikoak abenduaren 7an, 20:00etan, Euskalduna Jauregian emongo daben kontzerturako, Bilbo, Arte Portua zikloaren barruan. Kontzertua James Newton Howarden soinu-bandei eskainiko jake, eta horrek berak zuzenduko dau Fernando Velázquezegaz batera.

Koral Alkartearen esanetan, ekimenaren helburua da ahotsak gehitzea, izan be, gauza segurua da koruan abestea ederra, dibertigarria eta osasungarria dala; esangura horretan, alkarteak bere 130. urtemugea erabili nahi dau musikazale gehiago erakarteko eta, era berean, alkartea bere ohiko inguruneaz harago ezagutzera emoteko.