'Bizkaiko boto-eskaintzak, itsasoko sinismenak' erakusketea Bilbon ikusgai maiatzaren 9tik garagarrilaren 27ra

| Ikusi handiago | Argazki originala

Gaur, maiatzaren 9an, Bilboko Ondare Aretoak Bizkaiko boto-eskaintzak, itsasoko sinismenak erakusketea zabalduko dau. Itsasoaren arloko historialaria eta erakusketearen komisarioa dan Xabier Armendarizek batutako 35 boto-eskaintza eta opari egongo dira ikusgai. Objektuak ondoko lekuetakoak dira: Markina-Xemeingo Amalloko San Joan baseleizea; Portugaleteko Andra Mari basilikea; Gorlizko Andra Mari eleizea; Bilboko Begoñako basilikea; Bermeoko Gaztelugatxeko San Joaneko baseleizea; Santurtziko  Mamarigako baseleizea; Arteagako Karmen baseleizea; Sopelako Karmen baseleizea; Zierbenako Virgen del Puerto baseleizea; Barakaldoko Santa Ageda baseleizea; Gizaburuagako Santa Katalina baseleizea; Pobeñako (Muskiz) Nuestra Señora del Socorro baseleiza, eta Eako Talako Amaren baseleizea.

Aldi berean, erakusketan sei museok lagundu dabe euren objektuak eskainiz; honakoak dira: Bilboko Eleiz Museoa; Enkarterriko Museoa, Abellaneda-Sopuertan dagoana; Euskal Museoa; Butroeko Plasentia Museoa, Plentzian; Bermeoko Arrantzaleen Museoa eta Bilboko Itsasadarra Itsas Museoa.

 

Hamar urteko lan sakonaren emoitzea 

Itsas-eskaintzak itsasgizonek momentu arriskutsuetan tenplu horreetako zaindarien bitartekaritzea eskertzeko itsasoaren arloan tradizinokoak ziran eleiza edo baseleizetan ixten zituen opariak dira.

Itsasoaren arloko historialaria eta erakusketako komisarioa den Xabier Armendarizek 2006. urtean ekin eutson azterlan eta inbentario honi, gaur egun gai honetan estaduan ezagutzen dan osoena. Gaur arte era askotako jatorriko 130 objektu batu ditu inbentariora. Itsas-eskaintza edo zinopari horreek gaur egun Bizkaiko baseleizetan eta eleizetan dagoz, baita Museo eta bilduma partikularretan be.

Erakutsiko dituen 35 objektu horreen artean era askotakoak dagoz, besteak beste, itsasontzien maketak eta emoileek bizi izan zituen ekatxak edo momentu arriskutsuak naturalismo osoz deskribiduten dituen pinturak. Era berean, asko dira elementu erlijiosoak, adibidez kustodiak edo kalizak, itsasontzietako ekipamenduak (flotagailuak, buiak edo arraunak), baita arrainen hazurdurak be. Horrezaz gan, nabarmentzekoak dira gure eleiza askotan ur bedeinkatua jarteko erabilten diran tridacna gigas-en maskor apartak.

 

Zinopari guztiek euren historia dabe  

Objektu bakotxa itsasoko jazoera bategaz lotuta dago. Guztiek emoten dabe informazino interesgarria eta, batzuetan, baita pasadizo bitxiak be. Hori da adibidez, itxuraz Afrikatik esklaboen trafikoa egiten eban Bilbaína fragatearen kasua, edo Munduko Lehen Gerran urpekari aleman baten erasoa hartu eban Aizkorri Mendi ontziarena.

Bizkaiko zinoparirik zaharrena 1768 urtekoa da eta Pobeñako (Muskiz) Nuestra Señora del Socorro baseleizakoa da; horren bi kopia dagoz. Garagarrilak 21 izeneko fragatearen barruan aro viktoriarreko emakume baten argazki bi topau zituen.

Erakusketan, aldi berean, XIX. mendean pintore ospetsua izan zan Chales Gregory-ren koadro bat ikusteko aukerea dago; pintore honen obra osoa Greenwich-eko Itsas Museo Nazionalean ikus daiteke.

Erakusketea Ondare Aretoan egongo da, Bilboko María Díaz Harokoa kaleko 11. zenbakian, maiatzaren 9tik garagarrilaren 27ra arte.

Inaugurauko daben egunean, astelehenean, komisarioak bisita gidatua egingo dau hurreratuko diranentzat. Bisitea erreserbetako telefono zenbaki honetara deitu behar da: 944 066 341