Eriz Morenoren erakusketea ipini dabe Bilboko Rekalde aretoan, Barriek programearen barruan

| Ikusi handiago | Argazki originala

Bizkaiko Foru Aldundiak artista gazteen lana bultzatzeko antolatzen dau Barriek beka deialdia eta erakusketa zikloa. Martiaren 8tik maiatzaren 8ra, Eriz Morenoren txandea da. Bratstvo/Jedinstvo izeneko erakusketea ipini dau artista bilbotarrak Rekalde aretoko Kabinete Abstraktuan, Jugoslavia zaneko lurretan sortutako eta batutako materialakaz.

Esperientzia artistikoaren barruan, Eriz Morenok beti euki dau bidaien inguruko interesa. 2012an, esaterako, Berlin izeneko 30 herri bisitau zituan mundu zabalean, eta hango materiala batu. Oraingo honetan be, Barriek bekearen babesagaz, antzeko proiektu baten sartu da. Balkanetan, Jugoslavia ohiko herrietan, ibili da Moreno.

Jugoslavia herrialde batua zaneko sasoiak gogoratzeko, era askotako materiala batu dau Morenok Bratstvo/Jedinstvo erakusketan: Ikus-entzunezkoak, propagandea, argazkiak, liburuak, txanponak eta abar. Dokumentu historikoak zein artisteak berak Balkanetan grabautako bideoak dagoz.

Pieza bitxienetako bat, Jugoslavia ohiko autobide baten Eriz Morenok grabautako bideoa da. Bertako irrati lokaletako soinua hondoan entzuten dala, autobidean egindako bidea ikusten da bideoan, etenik bako 10 orduko grabazinoan. Autobide horrek Jugoslavia ohiko sei errepublikak zeharkatzen ditu eta sasoi baten Bratstvo i Jedinstvo izena eukan, hau da, Anaitasunaren eta Batasunaren Autobidea. Erakusketearen izena hortik hartu dau artisteak.

1980ra arte Jugoslaviako buruzagi izandako Tito Mariskalaren berbaldi bat be eroan dau Morenok Rekalde aretora, baita banderak eta ereserkien grabazinoak be. Ekialdeko Europako herrialde komunista ohietako estetikea sarri agiri da Morenoren obran. 

Barriek programearen 2016ko bigarren erakusketea da Morenorena. Maiatzaren 8ra arte egongo da ikusgai Errekalde aretoko Kabinete Abstraktuan. Ondoren etorriko dira David Martinez, Zaloa Ipiña, Ana Riaño eta Amaia Gracia Azquetaren erakusketak, 2017ko urtarrilera arteko zikloan.