Gaueko estropadea jokatuko dabe zapatuan Bilboko Itsasadarrean

Hamar traineruk parte hartuko dabe Bilboko gaueko estropadan. Tartean dagoz, nobedade moduan, emakumezko talde bi. Estropadea zapatu arratsaldeko 18:15ean hasiko da, ilundu eta gero. Urteerea eta helmugea Pio Baroja plazako moiletan egongo da eta parte-hartzaileek lau luzeko ibilbidea bete beharko dabe, lehenengo eta hirugarren ziabogak Arrupe zubiaren azpian eginaz.

Hirugarrenez egingo dabe aurten gaueko estropadea Bizkaiko uriburuan. Deustuko Arraun Taldeak, Tecuni enpreseak eta Bilboko Udalak antolatzen dabe lehia berezi hori. Bizkaiko Federazinoko epaileek jagongo dabe estropadea.

Aurtengoan, hamar traineruk emon dabe izena: Gizonezkoen Portugalete, Deustua, Elantxobe, Arkote, Mundaka eta Hibaika, emakumezkoen Deustua eta Hibaika, 21 urtez azpiko mutilen Deustua eta mutilen gazte mailako Portugalete. Aurtengo nobedadea emakumeen traineruak sartzea izan da. Bilboko Udaleko zinegotzi Oihane Agirregoitiak adierazo dauenez, benetako bardintasuna lortzeko ezinbestekoa da emakumeen kirola indartzea.

Erlojupeko modalidadean jokatuko da estropadea, Bilboko Itsasadarrean. Abiapuntua Pio Baroja plazako moiletan egongo da, uriaren erdiguneko Abando auzoan. Kanpoko ziabogak Arrupe zubian egingo ditue arraunlariek, Deustuko Unibersidadearen aurrean. Guztira, lau luze, hiru ziaboga, egin beharko ditue (hiru itsas milia).

Arratsaldeko 16:45ean ordezkarien batzarra egingo dabe eta, behin ilunduta, 18:15ean hasiko dira traineruak lanean, txandaka. Arraunlariek ibilbidea erabat ilunetan ez daien egin, argiztatze sistema berezia ipiniko dau Tecuni enpreseak itsasadarraren ertzetan eta traineruen barruan.

Ikusi argazki guztiak handiago