Azokako informazinoa eskuko telefonoan eskura, Durangaldea app dobako aplikazinoaren bidez

Durangaldeari eta Azokearen ganeko oinarrizko informazinoa jaso nahi dozu? Non aparkau, zer ikusi, albisteak irakurri eta autobusen ordutegiak konsultau gura dozuz? Bada, Gerediaga alkarteak martxan jarri dauen Durangaldea app dobako aplikazinoaren bidez, Azokeari eta Durangaldearen ganeko oinarrizko informazinoa jaso ahal izango dozu zeure eskuko telefonoan.

Aplikazinoaren helburua, beraz, honakoa da: Azokara hurrratzen diran bisitariei Durangaldea ezagutzera emon eta informazino praktikoa eta turistikoa eskaini.

Erabiltzaileek Durangaldeko herrien informazino laburra topauko dabe bertan: jatorduetarako eta lotarako lekuen informazinoa; leku interesgarriak; kultur ondarea eta zerbitzu praktikoak –aparkalekuak, kutxazainak, gasolindegiak, umeen parkeak eta abar–. Zerbitzu praktiko guztiak, ganera, geolokalizauta dagoz, eta, beraz, modu errazean mapan topau ahal izango dira.

Azokeak, bere aldetik, atal berezia dauka aplikazinoan, eta azokazaleek kulturearen plazearen ganeko oinarrizko informazinoa irakurri ahal izango dabe bertan: albisteak, egitaraua, agendea, eta aurten lehen aldiz Gerediagak martxan jarri dauen dobako autobus zerbitzuaren ganeko informazinoa –ordutegiak, geltokiak eta abar–. Egitarau osoaz gan, bakotxak gustoko dauen agendea egiteko aukerea be izango dau, gustoko dituan ekitaldiakaz.

Aplikazinoa Android eta IOS sistemetarako prestauta dago, eta doban deskargau daiteke. Androiden dagoeneko eskuragarri dago, eta IOSen, barriz, bihartik aurrera, abenduaren 4tik, deskargau ahal izango da. Aplikazinoa martxan egon arren, modu jarraituan eguneratzeko asmoa dauka Gerediagak. Hurrengo hileotan eskualdeko norbanako eta eragile desbardinakaz batera aplikazinoa elikatu eta osotzea da helburua.

Aplikazino hau Gerediaga alkartearen ekimenez jaio da, Euskaltelen babesa dauka eta Di-Da enpresea izan da diseinuaren arduraduna.

Ikusi argazki guztiak handiago