Txomin Badiolak, Elena Aitzkoak eta Entre Cuerpos-Mugatxoan Alkarteak jaso ditue 2015eko Gure Artea Sariak

| Ikusi handiago | Argazki originala

Joxean Muñoz Kultura, Gazteria eta Kirol sailburuordeak eta Xabier Ganzarain, Gure Artea sarien 2015eko edizinoko epaimahaikideak, lehiaketearen aurtengo irabazleei sariak banatu detseez bart Bilboko Azkuna zentroan egindako ekitaldian. Txomin Badiola eskultore bilbotarrak, ibilbide artistikoaren autormenari jagokon modalidadean jaso dau 2015eko Gure Artea saria; Elena Aitzkoak, sorkuntza-lana autortzeko modalidadean; eta hirugarrenik, ikusizko arteen arloan egindako lana autortzen dauen modalidadean kultur alkarte batek jaso dau aurten saria: Blanca Calvo eta Ion Munduatek zuzentzen daben Entre Cuerpos-Mugatxoan alkarteak, hain zuzen be.

Gure Artea sarien bidez 65.000 euro banatzen dira urtero irabazleen artean: 25.000 euro lehen bi modalidadeetako bakotxean, eta 15.000 euro hirugarrenean. Sari honeen bidez, artistek egin daben lana autortu eta arte garaikidean eta euskal kulturan egindako ekarpena onartu nahi jake irabazleei. Sortzaileak saritzen dira -bai euren ibilbide profesionalagaitik, bai azken urteotan egin daben sormen jarduereagaitik- baina baita beste eragile edo erakunde batzuk be, arte plastikoen edo ikusizko arteen eremuan egin daben lanagaitik.

2015eko Gure Artea sarien epaimahaiburu Maria Mur Dean izan da, Consonni arte garaikideko produkzino etxeko zuzendaria. Honegaz batera, epaimahaiko eledun izan dira: Inazio Eskudero eta Txarro Arrazola artistak, Leire Vergara komisario eta Bulegoak z/b arte bulegoko kidea, eta Xabier Ganzarain, Kalostra arte esperimentaleko eskolako koordinatzailea.