Julen Iriondok irabazi dau 2015eko Rikardo Arregi kazetaritza saria

| Ikusi handiago | Argazki originala

Eusko Jaurlaritzeak euskeraz egindako kazetariteza saritzeko sustatutako Rikardo Arregi sariak banatu ditue joan dan zapatuan Andoainen.

Aurtengoa Goiena tokiko komunikabidean argitaratutako lan batentzat izan da: Julen Iriondo kazetaria izan da sariduna, hiesari eta Jon Salaberri hiesaren kontrako ekintzaileari buruz egindako idatzizko lanagaitik.

Kazetari barriari emondako saria, barriz, Samara Velte 24 urteko zarauztarrarentzat izan da, Eskoziako erreferendumari buruz Berria egunkariak kaleratutako lanagaitik.

Horrezaz gan, aurtengo edizinoan sari berezi bi emotea be erabagi dau epaimahaiak aurkeztutako 31 lanen kalidade bikaina saritzeko. Bata Mikel Ibargoieneri emon deutsie, Gaur8 astekarian emakume kirolarien ganean plazaratutako bildumeagaitik. Bestea, barriz, Iñigo Astiz nafarrari emon deutsie, Berrian argitaratutako Kantuan diren lekuak erreportajeagaitik.

Andoaingo alkateak eta Eusko Jaurlaritzako Hizkuntza Politikarako sailburuorde Patxi Baztarrikak adierazo dabenez, sariokaz azpimarratu nahi dabe euskerazko kazetaritza modernoak euskerearen normalizazinori egiten deutson ekarpena.