I. Batera Rock Eguna ospatuko da Bermeon datorren zapatuan

| Ikusi handiago | Argazki originala

Nuntxaku Kultur Elkarteak, Beleza Malandra Ateneo Kulturalak eta Bermeoko Kafe Antzokiak I. Batera Rock Eguna antolatu dabe datorren zapaturako, bagilaren 13rako, Trigger Travis, El Desvän del Macho, Perlak, Villapellejos, Capitán Entresijos, Los Amantes eta Fabuloso Combo Espectro taldeakaz. Saioak eguerdi aldera hasi eta goizaldean amaituko dirala aurreratu dabe antolatzaileek.

Bermeoko I. Batera Rock Eguna 13:30ean hasiko da, Castelloko Los Amantes taldeak Beleza Malandra ateneoan eskainiko dauen kontzertuagaz. Jarraian, jai giroa Nuntxaku Kultur Elkarteak kudeatzen dauen Kapilla aretora lekualdatuko da, 15:00etatik aurrera herri bazkaria izango baita bertan.

Bazkaldu ondoren, musikea bueltauko da, Villapellejos talde bilbotarrak eta Fabuloso Combo Espectro banda madrildarrak 17:00etan hasita Kapillan bertan eskainiko daben kontzertuagaz.

Kapillako saioak amaituta, Batera Rock Eguna Beleza Malandra ateneora itzuliko da eta Capitán Entresijos talde madrildarrak kontzertua emongo dau bertan 20:00etatik aurrera. Hurrengo emonaldia Kafe Antzokian izango da, 21:00etan, Trigger Travis talde giupuzkoarragaz.

Kafe Antzokitik Beleza Malandrara joango da barriro Batera Rock Eguna eta El Desvän del Macho gipuzkoarrek joko dabe 22:00etatik aurrera.

Kontzertuakaz amaitzeko, barriz, 00:30etik aurrera, Perlak talde gipuzkoarrak joko dau, Kafe Antzokian. Bermeoko I. Batera Rock Eguna Beleza Malandra Ateneo Kulturalean amaituko da, 02:00etatik aurrera DJ Mambru eta DJ Brown disko jartzaileakaz.

Kontzertuetarako sarrerea mugatua izango da, aretoak bete arte; beraz, antolatzaileek 5 euroko bonua erostea gomendatu dabe (8 euro bazkaria barne hartuta). Bonuak Luma liburudendan, Beleza Malandra Ateneo Kulturalean eta Bermeoko Kafe Antzokian dagoz salgai.