Ruper Ordorikak jasoko dau 2015eko Adarra Saria

| Ikusi handiago | Argazki originala

Igaz Donostiako Udalak, Donostia Kulturaren bidez, Adarra saria sortu eban euskal musikearen arloan garrantzi edo eragin bereziko ibilbidea egin dauen edo egiten dagoan artista bat omentzeko. Lehen edizinoan, 2014an, saria Mikel Laboaren sorkuntza-lanari eta maisuari emon jakon. Aurten, barriz, Ruper Ordorikari ematea erabagi dau aholkularitza batzordeak, aho batez.

José Antonio Echeniquek, Jon Eskisabelek eta Agurtzane Aizpuruk osotutako aholkularitza batzordeak arrazoi honeek hartu ditu kontuan, besteak beste: Ruper Ordorikak bere estiloaren berezko modernotasunari eta proposamen musikalari ibilbide luze eta emonkorra gehitzen deutsoz. Ibilbide horretan, Ruperrek, Euskal Herriko abangoardiako artistekaz ez eze, beste jatorri eta tradizino batzuetako lehen mailako artistakaz be grabau eta konpartidu ditu proiektuak. Ohikoa da Ruperrek jazzeko eta rock garaikideko artista amerikarrakaz alkarlanak egitea eta diskoak produzidutea. Era berean, Ruper Ordorikak euskal kantutegiaren zati garrantzitsu bat berreskuratu eta eguneratu du, bai bere izenean eta bai lan talde lanetan partaide izan dan proiektuen bitartez. Ruper artista ezaguna eta errespetatua da bere abesteko estilo propioagaitik, izan dauen ibilbidearen seriotasunagaitik, bere jarrera artistikoaren modernotasun berezkoagaitik eta konpositore lez egin dauen lanaren sakontasunagaitik.

Saria emoteko ekitaldia 2015eko bagilaren 21ean egingo da Donostiako Victoria Eugenia Antzokian.

Ruper Ordorikak igazko udagoienean kaleratu eban Lurrean etzanda diskoa, eta orain lan hori zuzenean aurkezten dabil. Bihar, hilak 6, Gasteizko Jimmy Jazzen kontzertua eskainiko dau, 21:00etan.