Alberto Ladron Aranak 'Harrian mezua' nobela baltza aurkeztu dau

| Ikusi handiago | Argazki originala

Negu gorrian, edurte handi baten ostean, mendi puntan gizon baten gorpua topau dabe, biluzik, eta saiek erdi janda. Lau urteko neskato bat be desagertu da, eta poliziak susmoa dauka jazoera biak ez ete dagozan lotuta. Leire Asiain Foruzaingoko inspektoreak dauka kasuaren ardurea. Horixe da Alberto Ladron Aranaren Harrian mezua (Elkar) nobela barriaren abiapuntua.

Aurreko nobela baltzetan lez, egileak alkarrizketa biziak, erritmo arina eta suspensea darabilz lan barrian. Oraingoan, Leire Asiain Foruzaingoko inspektorea da protagonistea. Gustura jardun dau Ladron Aranak, eta hurrengo nobeletan be agertuko dala aurreratu dau. Ahuldade asko dituan emakume indartsua da. Ikerketeari ekin orduko kasua nahasten hasten da, umearen bahiketea, prostituzino-sareak, ETAren kontrako burruka zikina...

Dokumentazino lana egin behar izan dau egileak foruzainen behar egiteko modua azaltzeko. Horretarako hainbat foruzainegaz berba egin dau. Aurreko liburuetan, foruzainak agiri izan badira be, bigarren mailako personaiak ziran, baina oraingoan protagonista dira.

Alberto Ladron Aranak (Iruñea, 1967) misteriozko nobelak idatzi izan ditu batez be, besteak beste, Eguzki beltzaren sekretua, Arotzaren eskuak, Ahaztuen mendekua, Zer barkaturik ez eta Piztiaren begiak.