Bilbao BBK Live jaialdiak kontzertuak, zinemea eta erakusketak eroango ditu urigunera

| Ikusi handiago | Argazki originala

Bilbao BBK Live jaialdia Kobetamendiko zelaietatik uriaren erdigunera eroango dabe antolatzaileek dobako kontzertuak, erakusketak eta zinemea eskaintzeko. Holan, Arriaga Plazea ekitaldi areto erraldoi bihurtuko da La Bien Querida, Dorian, El Inquilino Comunista eta El Columpio Asesino taldeen kontzertuakaz, jaialdiaren 2014ko edizinorako kartelen lehiaketako erakusketeagaz. Gainera, El Cosmonauta zientzia fikzinozko filma proiektauko da BBK Aretoan, eta Kale Nagusian ezusteko kontzertu bat izango da.

Bilboko Udaleko iturriek jakinarazo dabenez, Arriaga Plazako dobako kontzertuei jagokienez, garagarrilaren 10ean, 20:00etan, La Bien Querida talde getxotarrak joko dau, eta 11n, 12an eta 13an, Dorian, El Inquilino Comunista eta El Columpio Asesino taldeen txandea izango da, hurranez hurran, guztiak 13:00ean.

Ganera, zuzeneko musikea Kale Nagusiraino be helduko da, ezusteko ikuskizun bat izango baita garagarrilaren 11n, arratsaldeko 13:00ean, BBK Aretoaren aurrean. Areto horretan El cosmonauta pelikulea aurkeztuko da; zehatz esateko, lau pantailatan proiektauko da aldi berean. Ekitaldi horretan, ganera, filmeko aktoreetako bat izango da, Tommaso de Santis italiarra, bai eta Nicolás Alcalá zuzendaria be. Filma crowdfunding sistemearen bitartez finantzau da, eta garagarrilaren 10ean ikusi ahalko da, 18:00etan.

Era berean, 2014. urteko Bilbao BBK Live jaialdiaren kartelen lehiaketako lanak izango dira ikusgai garagarrilaren 10etik 13ra bitartean Erriberako Merkatuan. Kartel irabazleaz gan, beste 44 lan finalistak be ikusi ahalko dira. Ganera, aurreko zazpi edizinoetako argazkiek osotuko dabe erakusketea. 19:00etan inaugurauko da.

Tako Bilbao BBK Live

Bilbao BBK Live jaialdiaren jarraitzailerik fidelenentzat, jaialdiak izan dituan zazpi edizinoetako argazkiakaz egurrezko lan bat plazaratu da: Tako Bilbao BBK Live. Edizino mugatu eta zenbakitua da, 90 kopia baino ez dagoz, eta Stuart McDonald, Jon Oleaga eta Gorka Ruiz de Herediren argazkiak jasoten ditu. Eguen honetatik aurrera egongo da salgai Bilboko Alondigako Tako dendan eta Erriberako Merkatuko erakusketan.

Jaialdiagaz lotutako guztiaren gaineko informazino gehiago behar izan ezkero, garagarrilaren 8an Bilbao BBK Live Informazino Bulegoa zabalduko da BBK aretoan, eta publikoarentzat zabalik egongo da garagarrilaren 14ra arte, 11:00etatik 14:00ak arte eta 16:30etik 21:00ak arte.