Durangaldea eta Ipar Uribe aurrez aurre Bertsolari Gazteen XXI. BBK Sariketako finalean

Bertsolari Gazteen XXI. BBK Sariketearen finala barikuan, martiaren 22an, egingo da eta Durangaldeko eta Ipar Uribeko taldeak aurrez-aurre izango ditu, biek gainditu baititue sailkatze frogak eta finalaurrekoak. Finala iluntzeko 19:00etan egingo da Bilboko Kafe Antzokian eta sarrerea doban izango da.

Epaimahaiari jagokonez, Arkaitz Estiballesek, gaur egun Bizkaiko bertsolarien txapeldunak, Juanjo Respaldizak, Bizkaiko Ikastolen Alkarteko bertsolaritza arduradunak, eta Gorka Intxaurbek, filologian eta bertsolaritzan adituak, osotuko dabe. Gai jartzaile lana Bernardo Mandalunizek egingo dau.

Talde finalistak, ohikoa danez, bi adin-mailatan zatituko dira eta honako bertsolari gazteok osotuko ditue: Durangaldekoa Garoa Angiozarrek, Iruri Altzerrekak, Txaber Altubek, Aitor Bizkarrak, Ander Gerrikaetxebarriak eta Ane Alegriak. Ipar Uribekoan, barriz, Unai Mendiburu, Aitzol Muruaga, Paule Loizaga, Inazio Vidal, Peru Vidal eta Imanol Uria lehiatuko dira.
Bi talde finalisten artean 2.000 eurotik gora banatuko dira saritan, eta txapeldunak 1.260 euroko lehen saria jasoko dau. Bigarren sarituak 900 euro jasoko ditu eta 140 euroko saria izango dau bizkaiera egokiena erabilten dauen bertsolari gazteak.

BBK-k, Bizkaiko Bertsozale Alkarteagaz eta Bizkaiko Ikastolen Alkarteagaz alkarlanean antolatzen dau lehiaketa hau. Lehen sailkatze probak ezin izan zituen gainditu Busturialdeak, Enkarterrik eta Lea Artibaik. Finalaurrekoak, barriz, Durango eta Algortako institutuetan egin ziran, ehunka ikusle gazte zaratatsuren aurrean. Arratia eta Bilboaldea finalaren atarian gelditu ziran.

Bertsolarien harrobi ona

Zazpi talde desbardinetan, Bizkaiko beste hainbeste eskualdetako 45 bertsolari gaztek esku-hartu dabe BBK Sariketearen XXI. edizinoan. Azpimarratzekoa izan da hamalau bertsolari lehen aldiz igon dirala oholtzara era honetako lehiaketa batean parte hartzeko. Datu honek erakusten dau harrobi indartsua dagoala Bizkaiko bertsolari gazteen artean. Izan be, finalera heldu diran bi eskualdeek, Durangaldeak eta Ipar Uribek, bertsolaritzan ibilbide oparoa egin dabe dagoeneko, neurri handi batean beren bertso-eskolek emondako bultzada garrantzitsuari esker. Eskola horreetan hazi eta hezitakoak dira, besteak beste, Igor Elortza, Unai Iturriaga edo Miren Amuriza bertsolariak, Durangaldeari jagokonez. Algortako bertso eskolan, barriz, Fredy eta Xabi Paya, Jone Uria edota Arrate Illaro dira ezagunenetakoak.

Hain zuzen, Durangaldea eta Ipar Uribe dira lehiaketa honen finalera urte gehienetan heldu diran taldeetako bi. Durangaldeak hiru alditan irabazi dau BBK txapela eta sei bider Ipar Uribek, Lea Artibaiko taldeak beste.


Aurreko urteetako irabazleen zerrendea

Ikusi argazki guztiak handiago