Jennifer Cardini paristarra 2012ko azkenengo Art After Dark saioan

| Ikusi handiago | Argazki originala

Jennifer Cardini, Stefan Storm eta Mr. Chaseren emonaldiek zarratuko dabe 2012ko Art After Dark saioen egitaraua, gaur, 22:00etatik aurrera, Bilboko Guggenheim museoan.

Mr. Chase musikari eta Dj bilbotarrak abiatuko dau gaua, berak sortutako nerabeentzako pop formula koralagaz. Ostean, 23:00etan, Stefan Storm suediarraren txandea izango da. The Sounds of Arrows taldeko kidea da, Oskar Gullstrandegaz batera. Danger! eta Into the Clouds pop kantek zaleen arretea biztu eben. Voyage diskoa plazaratu eben ostean. Lady Gaga eta Alphabeaten artisten lanak nahasten ditue euren emonaldietan.

Gaueko izarra Jennifer Cardini paristarra izango da. Bagilean, museoan, egin eban kontzertuak arrakasta handia izan eban. Europako techno musika esperimental onenetakoa eskaini deusku gaerditik aurrera. Hamar urtean Parisko Le Pulp eta Rex Club areto ezagunetan jo dau; gaur egun, Europako beste hainbat lekutan ipinten dau musikea, berbarako, Londresko Fabricen, Bartzelonako Nitsan eta Berlingo Panorama Bar izenekoan. Cardiniren musikea groovy, deep eta dark estilokoa da, jantzarako apropos-aproposa.

Art After Dark saioen bidez, Guggenheim museoak musikea eta artea buztartzen ditu hilean behin, izan be kontzertuetara datozanek momentu horretan museoan ikusgai dagozan erakusketez gozetako aukerea daukie, 22:00etatik 1:00etara. Ondoko erakusketak dagoz orain, Guggenheimen: Bizitako arkitektura, Egon Schiele: Vienako Albertina Museumen artelanak eta Claes Oldenburg: hirurogeiko hamarkada.

Betiko lez, Guggenheimeko sarrereagaz batera, Bilboko Fever kluberako txartela jasoko dabe, bertan egunean erabilteko, 00:00etatik aurrera. Art After Dark saiorako sarrerak (18 urtetik gorakoentzat) 12 euro balio dabe, eta 8, Museoaren Lagunentzat.