Joaquin Atxukarroren emonaldia, Miguel de Unamunoren heriotzearen 75. urteurreneko ekitaldiak amaitzeko

| Ikusi handiago | Argazki originala

Joaquin Atxukarrok zarratuko dau Miguel de Unamunoren heriotzearen 75. urteurrena gogoratzeko antolatutako egitaraua astelehenean. Pianista bilbotarrak Bach, Chopin, Guridi, Ravel, Debussy eta Fallaren lanak eskainiko ditu abenduaren 17an, Bilboko Bidebarrieta liburutegiko ekitaldi aretoan.

Errepertorioa asteleheneko emonaldirako beren-beregi egokitu dau Atxukarrok, Udaleko iturrien arabera. Errezitaldia 19:30ean hasiko da, eta sarrerak daborduko salgai dagoz, liburutegian bertan, 18 euroan.

Joaquin Atxukarroren (Bilbo, 1932). Ikasle zala nazinoarteko hainbat sari irabazi zituan. Liverpooleko Nazinoarteko Lehiaketan 1959an lortutako saria eta Londreseko Royal Festival Hall jaialdian Londreseko Orkestra Sinfonikoagaz egindako lehen emonaldiaren osteko kritika bikainek eguzagutarazo eben nazinoartean.

Ordutik, hamaikatxu kontzertu egin ditu mundu osoan zehar, 60 herrialdetan. New Yorkeko Avery Fisher Hall eta Carnegie Hall, Washingtongo Kennedy Center edo Berlingo Philharmonie aretoetan jo dau, besteak beste.

Unescok Artist for Peace izentau eban 2000. urtean, Sienako Accademia Chigiana-ko 'Accademico ad Honorem' da, eta Espainiako Arte Ederren Urrezko Dominea eta Musika Sari Nazionala jaso ditu, besteak beste. 2004an, Bilboko Seme Kuttun izentau eben.

Urte osoan Bilboko Udalak, Bizkaiko Foru Aldundiaren eta Eusko Jaurlaritzearen laguntzinoagaz, makinatxu bat jarduera antolatu ditu Miguel de Unamuno idazle bilbotarraren omenez. Joaquin Atxukarroren kontzertuak urteko egitaraua itxiko dau.