Jorma Kaukonen gitarristeak zarratuko dau Music Legends zikloa

| Ikusi handiago | Argazki originala

Jorma Kaukonen gitarrista bikainak zarratuko dau Music Legends zikloa abenduaren 11n, Bilboko BBK aretoan, eta historiagaz, lisergiagaz eta soinu azidoenakaz hitzordua izango da, antolatzaileek adierazo dabenez. Saioa 20:00etan hasiko da eta sarrerak, 26 euroko prezioan, aretoan bertan, BBKren orotarako kutxazainetan, 944 310 310 telefonoan eta www.salabbk.es webgunean erosi daitekez.

Fingerstyle gitarrearen maisua da Kaukonen. Egungo rock bizienaren eta distiratsuenen iturritik edaten dau, bai eta folk eta blues amerikarren iturri pizgarrienetik be, Hot Tuna taldearen (Jefferson Airplane taldeko kideakaz sortu eban talde paraleloa) azken diskoetan argi eta garbi itxi dauen legez. San Frantzizkon bizi zan 1960ko hamarkadan eta uriko klubetan Janis Joplin gazte baten gitarra-jolea zan garai haretan, eta alkarregaz grabau eben The Typewriter Tapes diskoa 1964an.

Jorma Kaukonen soinu azidoaren erakusle nagusietakoa da eta, horrezaz gan, psikodelia estadubatuarrak sortu eban talde nagusienetako kidea izan zan, Jefferson Airplane taldekoa, hain zuzen be. BBK aretoan, Barry Mitterhoff izango dau taldekide, Hot Tuna taldeko mandolina-jotzailea.