Bilboko Udal Musika Eskoleak bost prestakuntza tailer eskainiko ditu urteari hasierea emoteko

Bilboko Udal Musika Eskoleak, Udalaren Kultura eta Hezkuntza Sailaren menpe dagoan BilbaoMusika erakunde autonomoaren barruan dagoanak, Prestakuntza Tailer barriak antolatu ditu urteari hasierea emoteko. Eskolan emoten diran edukien prestakuntzea hobetzeko eta publiko guztiarentzat zabalik dagozan ikastaroek, oraingo honetan, bost ikasgai eskainiko ditue, bateriaren perfekzinoa landuko dan master class batetik hasi eta txalaparta, biola eta pianoa izango dira ikasgaiak. Eta jantza mintegian, Errenazimendu eta Barrokoko jantzearen garapena aztertuko da.

Ikastaroen matrikula epea zabalik dago kurtso bakotxeko plaza kopurua bete arte eta publiko guztiarentzat dagoz zuzendurik. Era honetara, beste eskola batzuetako irakasleek eta ikasleek be emon lekie izena. Ikastaroak, BilbaoMusikako egoitzan emongo dira, Bilboko Sorkunde kaleko 8. zenbakian; jantza ikastaroa, barriz, Bilborock aretoan izango da.

Piano eta biolaren hobekuntza ikastaroek, 60 edo 30 minutuko saio personalizatuetarako aukerea eskaintzen dabe, baita, entzule moduan parte hartzeko aukerea be. Ikastaroaren matrikula prezioa, modalidadearen, ikasgaiaren eta tailerraren iraupenaren araberakoa izango da, baina edozein kasutan be, 10 euro, entzule moduan parte hartzeko eta 50, bakarkako saioetarako.

Irakasle entzutetsuak

Maila handiko profesionalek osotzen dabe ikastaro honeek emongo dituen irakasleak. Borja Barrueta, Gatibu edo Jorge Drexler lako ospetsuakaz lan egin dauenak, bateriaren master class bat eskainiko dau; Peio Otano, antxinako musikan berezitua dan koreografo eta konposatzaileak Jantza historikoa eta jantza tradizionala: Errenazimendutik Barrokora ikastaroa eskainiko dau; Cástor Narvarte, Euskadiko Orkestra Sinfonikoko bakarlariak, biolaren ikastaroa eskainiko dau; Oreka TX taldeko Harkaitz Martínezek eta Igor Otxoak, txalapartaren ikastaroa zuzenduko dabe; eta azkenik Luis Fernando Barandiarán Musika Eskolako zuzendariordeak, pianoaren master class bat eskainiko dau.

Udal Musika Eskoleak 2005etik antolatzen ditu Formazino Tailerrak eta jente ugarik parte hartu dau urte honeetan guztietan. Nahiz eta ikastaroen plaza kopurua murritza izan, deialdi bakotxak, batez besteko ehun parte hartzaile inguru izan ditu. Tailerrak hasi aurretik ordutegi eta daten zehaztasunak emoteko Eskolea bera jarriko da parte-hartzaileakaz hartu-emonetan.

BilbaoMusika, Bilboko Udaleko Kultura eta Hezkuntza Sailaren menpeko erakunde autonomoa da, eta Musika Eskola, Udal Musika Banda eta Txistulari Bandearen kudeaketearen arduraduna da. Informazino gehiago BilbaoMusikako egoitzan (Sorkunde 8, 48006 Bilbo), 94 416 47 85 telefonora deituz edota www.bilbaomusika.net webgunearen bitartez.

Prestakuntza tailerrak 2012

- Bateriaren Master class, Borja Barruetaren eskutik:
Data: Martia-maiatza, 12 orduko iraupena, 19:30etik 21:30era.
Prezioa: 40 euro

- Jantza historikoa eta jantza tradizionala: Errenazimendutik Barrokora, Peio Otanoren eskutik:
Data: Apirilak 28, zapatua — 3 orduko iraupena, 10:00etatik 13:00era.
Prezioa: 10 euro
Bilborock aretoan izango da (Mesedetako Kaia, 1).

- Biolaren Master class, Cástor Narvarteren eskutik:
Data: zezeilak 28 eta 29 eta martiak 1 eta 2 —16:00etatik 20:00etara.
Prezioa: 50 eta 30 euro klase indibidualak (60 edo 30 minutukoak). 10 euro entzule moduan.

- Txalaparta Ikastaroa, Oreka Tx taldearen eskutik:
Data: martiak 9 — 17:30etik 20:30era.
Prezioa: 20 euro

- Pianoaren Master class, Luis Fernando Barandiarán maisuaren eskutik:
Data: Martiak 14 eta 15 — 16:30etik 20:30era.
Prezioa: 50 eta 30 euro klase indibidualak (60 edo 30 minututakoak). 10 euro entzule moduan.

Izena emoteko epea: Bilbaomusikan (Sorkunde, 8), plazak aurretik beteten ez badira, kurtso hasierara arte. Telefonoa: 94 416 47 85, edo www.bilbaomusika.net webgunearen bitartez

Ikusi argazki guztiak handiago