'Inbidia' erakusketa kolektiboaren inaugurazinoa

| Ikusi handiago | Argazki originala

Inbidia erakusketea Arte Ederren Fakultadeko hamaika pintura irakaslek sormenaren eta taldekako sortze prozesuen inguruan garatu daben ikerketa proiektuaren azken emoitzea da. Kontuak kontu, zemendiaren 4an, 20:00etan, La Brotxa galeria izandakoan (Conde Mirasol 1, Bilbo) Inbidia izeneko erakusketa kolektiboa osotzen daben hamaika bakarkako erakusketetatik lehenengoa inaugurauko da.

2009an hasitako proiektu honen izenburua Irudi-esparru baten elaborazinoa, esperientzia desbardinetatik abiatuta da eta, bertan, Arte Ederren Fakultadeko Margolaritza saileko hamaika irakaslek hartu dabe parte: Fito Ramirez Escudero (proiektuaren zuzendaria), Iñaki Imaz, Usoa Fullaondo, Lorea Alfaro, Txaro Arrazola, Daniel Tamayo, Joseba Eskubi, Alberto Rementería, Txemi Medeiro, Rita Sixto eta Gentz Del Valle.

Ikerketa honegaz, pinturako sortze prozesuak aztertzeko modu egokia topau nahi da, eta horretarako hainbat estrategia desbardin erabili ditue, besteak beste, irudi-kateak edo mapa kontzeptualak egitea modu analogikoan eta bisualean norberaren sortze prozesuak azaltzeko. Ramirez-Escuderok adierazo dauenez, proiektu honen helburuetako bat artista plastikoaren jokabide intimoenak argitara ataratea izan da, betidanik sekretuan gordeak izan diranak, tailerraren eremu pribatuan.

Erakusketea bi zatitan banatzen da: bata kolektiboa eta bestea bakarkakoa. Lehenengo atalean, taldeko kideek egindako hainbat kartel ikusi daitekez. Bertan, autore bakotxaren erreferenteak islatuta agertzen dira, prozeduera, ideologia eta arlo personaleko erreferenteak. Eta, beste alde batetik, bakarkako erakusketan, autore bakotxaren lanak bata bestearen atzetik erakutsiko dira, bi astetik bi astera. Bakarkako lan honeek joan-etorrien edo galdera-erantzunen jokoetatik abiatuta izan dira sortuak. Lehen bakarkako erakusketea Iñaki Imazena izango da.