Oscar Wilderen 'Salome', Ortzai konpainia gasteiztarraren antzerki klasikoaren zikloan

| Ikusi handiago | Argazki originala

Gasteizeko jaien ostean, Harresiaren klasikoak antzerki-zikloa antolatu dau Ortzai antzerki eta zine laborategiak. Jaialdia abuztuaren 10ean hasi eta 12an amaituko da. Zikloak Oscar Wilderen Salome antzezlana taularatuko dau, Ortzairen lokalean, Pintoreria 39an, 20:30ean. Hurrengo egunetan be antzezpenak egingo ditue, leku eta ordu berean.

Mirena Nafarratek jokatuko dau Salomeren papela; Guillermo Sanzek, San Joan Bateatzailearena; eta, Beatriz Ramosek, Narrabothena. Ana Delgadok (Herodías), Iker Ortiz de Zaratek (Herodes), Idoia Rebollok, Penélope Gutiérrezek eta Jean Patrick Valcourtek osotzen dabe aktore-taldea. Wilderen lan askogaz pasau zan lez, Salome be zensurau egin eben.

Harresiaren klasikoak ekimenez gan, Neguko Familia Antzerkia eta Antzerki Sakro zikloak antolatu ditu konpainia gasteiztarrak. Taldeko zuzendari Iker Ortiz de Zarate sano gustura dago orain arteko erantzunagaz. Urte bi prestaketetan ibili ondoren, klasikoen inguruko antzerki zikloa eskainiko dau Ortzaik.

Ortiz de Zaratek azaldu dabenez, hasieran antzezlanak Gasteizeko harresien inguruan egitea pentsau eben, baina egun horreetarako eguraldi eskasa egingo dauela iragarri danez, emonaldiak Ortzai laborategiak uriko parte zaharrean daukan lokalean egitea erabagi dabe. Sarrerak salgai dagoz, 10 euroan.

Ortzai Antzerki Laborategia 2005ean sortu zan, Iker Ortiz de Zarateren ekimenez. Kanpoan hainbat urte emon ostean, etxera itzuli zan antzerkigile gasteiztarra, han ikasitakoa hemen erakusteko asmoz. Ortiz de Zarategaz batera, Puri Santamaria eta Janire Lasa dabilz irakasle.