Bizkaiko III. Burdin Kabotajea Portugaletetik abiatuko da garagarrilaren 28an

Eusko Ikaskuntzak, Itsas Begia alkarteagaz eta Abellanedako Enkarterriko Museoagaz batera, Bizkaiko III. Burdin Kabotajea antolatu dau. Bizkaia eta Nafarroaren arteko burdinaren itsas-ibilbide historikoa erakusten dau nabigazino sistema honek.

Garagarrilaren 28an hasiko da espedizinoa, Portugaleteko portutik, Brokoa izeneko ontzian, hain zuzen be. Eguenean bertan Ondarroara helduko da Brokoa, eta hurrengo egunean, hilaren 29an, Oriorantz abiatuko da, eta ostean, 30ean, Donibane Lohitzunerantz joango da. Askaineko portuan minerala deskargauko dau, eta ibilbidea abuztuaren 6an amaituko da Nafarroako Urdazubi herrian. Somorrostroko burdina banatzeko ibilbideak udan egiten zituan bela txalupearen kopia da Brokoa ontzia.

Kabotajea, kosta begien bistatik galdu barik nabigatzeko sistemea da, itsasbidea lurmuturretik lurmuturrera segiduz. XIII. mendetik XIX. mendera bitartean, hau izan zan Bizkaiko minerala burdinoletara eroateko modua. XVI. mendean Bizkaia, Gipuzkoa eta Baztango burdinolek Europa guztian konsumidutako burdin guztiaren %10 inguru produziduten eben.

Bizkaiko III. Burdin Kabotajearen helburua, antolatzaileek azaldu dabenez, itsas-janzkerak, abestiak eta pilotetako teknikak berreskuratzea da, ondare ez-materiala berreskuratzea azken baten.

Ikusi argazki guztiak handiago