Pablo Bergerrek gaur jasoko dau Ohorezko Mikel Saria

Pablo Berger. | Ikusi handiago | Argazki originala

Bilboko Udalak atondutako Zinebik 67. edizinoa inaugurauko dau gaur, zemendiak 21, 19:30ean, Arriaga Antzokian. Ekitaldian, Pablo Berger zuzendari bilbotarrak imajinario zinematografikoaren mugak zabaldu dituan lana autortzen dauen Ohorezko Mikeldi saria jasoko dau.

Filmografia koherente, arriskutsu eta humanista baten egilea, Bergerrek tradizinoa eta modernidadea, emozinoa eta pensamendua, umorea eta malenkonia buztartzen jakin dau.

Pablo Berger komunikabideen aurrean agertu da Arriaga Antzokian, Gonzalo Olabarria Bilboko Udaleko Kultura eta Gobernantzako zinegotziagaz, Joseba Lopezortega Zinebiko zuzendariagazeta Ramon Barea aktoreagaz batera. Bareak pare hartu eban Bergerren Mamá filma laburrean eta Bergerren merituak nababarmentzeaz arduratuko da inaugurazino-ekitaldian.

Inaugurazio-ekitaldia Pabellón 6 enpreseak zuzenduko dau. Zuzeneko eszenan sortutako soinu-bandea izango dau, baita jantzak, rap zitala, jantza urbanoa, zinemaz maiteminduta dagoan muntatzaile batek kontautako ipuina eta era bereko filmaketa-talde bi.

Bilboko alkate Juan Mari Aburtok, ondokoa adierazo dau: Bergerrek zinemearen munduari egindako ekarpen kulturala eta uriagaz dauen lotura estua nabarmendu behar da, baita Bilboko sortzaile internazionalenetako bat izatea be.

Pablo Berger

Bere jaioterrian, Bilbon, ikasi ondoren, Bergerrek 1988an ekin eutson bere filmografiari, Joaquín Trincadoren produkzinoa eta Álex de la Iglesiaren zuzendaritza artistikoa izan eban Mamá film laburragaz. Horrek, sari ugari eta New Yorken zinema master bat ikasteko bekea emon eutson. Bertan, beste film labur bat zuzendu eban, Truth and Beauty, Emmy baterako izentapena izan ebana.

Hurrengo urteetan, Estadu Batuetan irakasle bezela ibiltzeaz gan, telebistako hainbat bideoklip eta iragarki egin zituan, 2003an bere opera prima zuzenduz: Torremolinos 73. Lan horri esker, Malagako Zinemaldian Urrezko Biznaga eta Goya sarietarako lau izentapen lortu zituan.

Bere bigarren lana, Blancanieves, ez zan 2012ra arte heldu eta Goya sarietan arrakasta handia lortu eban hamar sari irabaziz, tartean jatorrizko gidoi onenarena, Oscar sarietan Espainia ordezkatzeaz gan. Bost urte geroago, Abracadabra estreinau eban, Maribel Verdú, Antonio de la Torre eta José Mota protagonista zituan komedia baltza.

Robot Dreams filma da bere azken arrakasta handia, Cannesko Zinemaldian aurkeztutako animazinoko lana eta Oscarretan animazinoko film luze onenaren izentapena izan ebana.

Pablo Bergerrek Arte Ederretako Merezimenduaren Urrezko Domina (2023), Ohorezko Dibooen Saria (2024) eta Frantziako Gobernuak Arteen eta Letren Zaldunaren saria (2015) jaso ditu. Hollywoodeko Akademiako kidea da eta nazinoarteko atzera begirakoak izan ditu haren zinemagintzan.

Bilbotarra sortzaile askea da, zinema emozino eta ezagutza-modu konbertidu dauen narratzailea, munduari apaltasun eta jakituriaren buztarketa zehatz eta argitsuagaz begiratzen deutson artistea. Orain, Zinebik harenibilbidea autortzen ddau Ohorezko Mikeldia emonez.