Elnako amaetxeari buruzko erakusketea zabalduko dabe Gernikako Bakearen Museoan

Gernika-Lumoko Bakearen Museoak Elnako amaetxea: Erbesteko sehaskak aldi baterako erakusketea zabalduko dau bagilaren 16an. Kataluniako Gobernuak eta Memorial Democratic erakundeak atondu dabe erakusketea.

Elnako amaetxea: Erbesteko sehaskak erakusketeak Elisabeth Eidenbenz maistra suitzarraren istorioa azaltzen dau. 1939 eta 1944 urteen artean, Sant Cebriá del Rosellon, Argelers, Ribesaltes eta el Barcarès-eko errefuxiatu-guneetan egozan errepublikarren egoerea benetan be gogorra zan. Erbestaratu hareen seme-alabak salbau zituan Eidenbenzek, danetara 597 ume.

Elisabeth Eidenbenz Espainian egon zan erizain Gerra Zibilean, Suitzako gobernuz kanpoko erakunde baten eskutik. Gerrea amaituta, Frantziara joan zan, eta han ikusi eban umedun egozan emakume errefuxiatuek hondartzetan erditzen ebela, ezelango laguntzino eta babes barik. Frantziako agintarien jarrerea ikusita zeozer egin behar ebala erabagi eban maistra suitzarrak. Modu horretan, emakume umedun talde bategaz eta beste erizain boluntarioen laguntzunioagaz, etxe abandonatu bat prestau eben Elnan, Perpinyàtik hurre dagoan herri txikian. Orain urte batzuk amaetxearen historioa jasoten dauen liburua kaleratu eban Assumpta Montellàk, La maternidad de Elna.

Erakusketearen arduradunek azaldu dabenez, bake gune bat izan zan hondamendi ikaragarri baten erdian. 36ko gerrearen osteko erbesteari buruzko historia hobeto ezagutzeko aukerea eskaintzen dau erakusketeak, eta Elisabeth Eidenbenz maistreak egindako lan itzela bere bai. Eidenbenz oraintsu hil da, 2011ko maiatzaren 23an.

Erakusketea urriaren 12ra arte egongo da zabalik.

Ikusi argazki guztiak handiago