IV. GetxoPhoto irailaren 2tik urriaren 3ra, 'Bizitzaren plazerrak eta aisialdia' ardatz

Aurreko hiru edizinoetan GetxoPhotoren komisario izan dan Alejandro Castellote komisarioari agur esan eta egindako lanagitik eskerrona adierazo ostean, aurten komisario lanak egingo dituan Frank Kalero katalanaren aitamena eginaz hasi dau Jokin Aspuruk IV. Nazinoarteko Argazkigintza Jaialdiaren aurkezpena.

Frank kalero gaztea izan arren, Pompeu Fabra Unibersidadean Ikusentzunezko Komunikazinoan lizentziatua da eta Argazkigintza Dokumentalean Masterra International Center of Photography-n (New York). Bennetonen Fabrica-n egoiliar izan zan (Italian), OjodePez aldizkariko sortzaile eta zuzendaria izan da eta egun Asiako herrialdeetarako Punctum izeneko argazki aldizkaria abian jartzen dabil.

Imanol Landa Getxoko alkate jn.agaz batera agertu da Jokin Aspuru jentaurrean Algortako Portu Zaharrean.

Begihandi taldeak antolatuta, 'Aisiari gorazarre' lemapean, musikan, sexuan zein muturrera eroandako kirolak dakarzan arazoak lako gaiak islatuko ditue Europa eta Ipar Ameriketako ia 20 egilek, tartean Eduardo Arrillaga elgoibartarrak. Kultur eta arte proposamenaz gan, herritarren parte-hartze kanalak zabalduz, emozinoak sortarazo nahi ditue, izan be, helburua jenteak jaialdia berezkoa sentidutea da, partaide izateko ekitaldi bat da Jokin Aspuruk adierazo dauen legez.

Ohikoa dan moduan, GetxoPhotok arlo bi hartuko ditu: batetik, erakusketea bera eta, bestetik, jardueren arloa. Erakusketak irailaren 2tik urriaren 3ra egongo dira ikusgai Ereagako hondartzatik Algortako Portu Zaharrera bitartean. Jarduerak, barriz, irailaren 2tik 5era izango dira eta hor konbidautako zenbait egileen presentzia izango daben parte hartzeko hainbat jarduera proposatu dira.

Irailaren 2an, Martin Parr argazkilaria eta Jaialdira konbidautako hainbat egileen topaketa batek GetxoPhoto 2010 edizinoari hasierea emongo deutso, Areetako Andres Isasi Musika Eskolan.

Jardueren egitarauan, Pop Proiekzinoa ekimena bueltauko da eta 'Ibili' bisita gidatuen programea. Horrezaz gan, Txema Salvansek, 'Argazkirik atera ezean hilko naz' lantegia eskainiko dau irailaren 2an eta 3an.

Aurten gainera argazkigintzearen inguruko aldizkari eta liburuak kontsultau ahal izango dira Papel izeneko txoko batean. Era berean, Photo Walk antolatuko da, argazkilari ospetsuen estudioetatik bisita gidatu bat.

Imanol Landa Getxoko alkateak poza azaldu dau IV. GetxoPhotoren aurkezpenean: 'indarra hartu eta ondo sustraituta dagoan kultur jarduerea da. Herriko kultur saretik sortutako proiektua eta herriarentzako beren-beregi sortutakoa izanik, pozik nago'. Getxoko alkate jn.ak konpromiso argia azaldu dau GetxoPhotogaz, arte joera barritzaileenak herrira dakarzalako eta, era berean, Getxoren irudia mundura zabaltzen dalako.

Ikusi argazki guztiak handiago