CD-Liburua argitaratuko dabe 'Getxo Sound-aren historia eta ibilbideari buruz

| Ikusi handiago | Argazki originala

Getxoko Udalak CD-Liburua argitaratuko dau XX. mendeko laurogeigarren hamarkadearen hasieran udalerrian sortutako 'Getxo Sound' izeneko pop-rock taldeen mobimentuari buruz. Udalak, lan honengaitik, 14.000€ pagauko deutso egileari, Alvaro Heras Gröhri hain zuzen, Bilboko musikearen eszenari buruz testu batzuen idazle getxotarra eta 90. hamarkadan 'Getxo Sound' mobimentuaren bi taldeetako kide izan zana: 'Bonzos' eta 'Painkillers'-ena. Lana 2011ko hasieran argitaratuko eta banatuko da.

Getxoko Alkateak, Imanol Landak, esan dau bertoko pop-rock taldeek Getxoko kultur arloan oso errotuta dagoan kolektiboa osotzen dabela eta, ahal dan neurrian, Udalak eskaini leikioen bermea merezidu dauela. Gaiaren harian, 90. hamarkadearen hasieratik, Kultur Etxeak taldeen errolda zabalik dauka, talde horreei laguntzak bideratzeko abiapuntua. Gaur egun, errolda horretan, berrogei bat talde izena emonda dagoz.

Imanol Landaren ustez, CD-Liburu honen argitalpena beste aurrerapausu bat da, etorkizunari begira, argi ixteko Getxoko mobimentu musikalean pop-rock taldeek daben garrantzia. Landak gogora ekarri dau 'badirala 30 urte 'Getxo Sound' sortu zanetik, taldeek eurek, Kultur Etxeagaz batera, sortutako mobimentua, eta oso errotuta egon zan, ez bakarrik gure udalerrian, baita Bilbo Handian be. Orduan sortu ziran 'El Inquilino Comunista', 'Los Clavos' edo 'Lord Sickness' taldeak, hainbat jaialditan, kontzertutan eta lehiaketa musikaletan parte hartu ebenak. Azken urteotan, gehitu dau Landak, 'bertoko banden susperraldia atzemon da eta horreek, Kultur Etxearen laguntzaz, estudiotan grabautako lanak argitaratu ahal izan ditue. Talde horreen artean dagoz, besteak beste, 'Sweet Oblivion', 'We Are Standard', 'Iraultza', 'Smile', edo 'Zodiacs' eta horreen musikea be lan honetan jasoko da'.

CD-Liburu honek, 'Getxo Sound-Sonido de Getxo' izenburua izango dauena, 80. hamarkadearen hasieran eta 2009 urte artean indarrean egon ziran Getxoko 50 bat talderen abestiak izango ditu (horreetariko batzuek jarraitzen dabe musika munduan). Hasiera batean 1.000 ale argitaratuko dira eta, hedabideetan, liburutegietan, udal artxibategietan zein talde parte-hartzaileen artean banatzeko asmoa dago.