Aurtengo 'Bertsogintza ikastetxeetan' ekimena amaitu da

Bertso Topaketak ikasleen bertsoak jentaurrera ekarteko plaza dira. Zuzeneko kantaldiaren indarrak eta bertso saio batean sortzen dan komunikazinoak osotzen dabe jaialdiaren gidoia. Amaieran, oroigarriak banatzen dira.

'Bertsogintza ikastetxeetan' proiektuan Basaurin parte hartu daben Arizko Ikastola, Basozelai - Gaztelu L.H.I, Etxegarai L.H.I, Kareaga Goikoa L.H.I, Lope de Vega L.H.I, San Jose ikastetxea eta Sofia Taramona L.H.I ikastetxea, Galdakaoko Aperribai herri ikastetxeak, Galdakaoko Eguzkibegi ikastola, Gandasegi herri ikastetxeak, Unkina herri ikastetxea eta Urreta herri ikastetxeak eta Txorierriko Derio L.H.I, Larrabetzu L.H.I, Lezama L.H.I, Zamudio L.H.I eta Sondikako Gorondagane L.H.I ikastetxeek agur esan deutsie aurtengo bertso ikasturteari.

Kurtsoan zehar egindako bertsoak jentaurrean agertzeko garaia da bagila. Hizkuntzea, kultuera eta musikea buztartuz, ikasleen sormena eta jente aurrekotasuna lantzeko aukera ezin hobea emoten dau ikastetxeen arteko jai handi honek.

'Ikusi nuenean zure ile latza, iruditu zitzaidan sorginen erratza…' kantuak emon eutson hasierea Aitor Rubio gitarra jolearen emonaldiari. Ahots nagusi bat gidari, eta berrehun eta berrogeitahamar ikasle bertsolaritzako irakasleak mikrofonoa noz pasauko zain. Bertso eta kantu herrikoien bide, ikasle guztiek batera ikasturtearen laburpen bat egin eben, bertso doinuen ezagutzan sakondu eta urteetan zehar belaunaldien artean transmitidu diran kantak lau haizetara zabalduz.

Ondoren, gelan preparautako bertsoak kantau zituen ikasleek. Taldeka banatuta, arpegian irribarrea eukela eta papera eskuan, urduritasunez baina pozik agertu ziran ikasleak Basauriko Social Antzokira.

'Ongi etorri topaketara ondo pasatuko dugu, bertsoa dugu gure bidea, bertsoa gure helburu…' hasi eban bere saioa Arkaitz Estiballes bertsolariak. Ikuslea eta bertsolariaren artean sortzen dan komunikazino zuzenean trebe ibili ziran bertsolariak. Ikasleak eurak izan ziran gai-emoile.

Amaitzeko, ikastetxeetako arduradunak, udaleko ordezkariak eta 'Bertsogintza ikastetxeetan' proiektuan parte hartu daben ikastetxeei, oroigarri bana banatu jaken eta danen artean bertso bat kantatuz amaitu zan 2010eko Bertso Topaketea.

Ikusi argazki guztiak handiago